Iha intervista ho Jornal Independente, labarik ho idade 14 husi Munisipiu Bobonaro hateten, dadaun nee nia faan manutolun daan iha merkadu Taibesi, nunee bele tulun rendimetu familia.

“Hau eskola iha Bobonaru, maibé agora eskola hotu-hotu feriadu, entaun hau mai Dili hodi buka moris liu husi faan manutolun,” dehan Ronaldino iha Merkadu Taibesi, (01/09).

Nia haktuir, inan-aman la servisu no iha situasaun hanesan nee defisil tebes ba sira atu hetan osan, nee duni nia aproveita tempu feriadu ida nee hodi faan netik manutolun para bele heta netik osan ruma hodi sustenta nesesidade familia.

“Dader tuku 8:00 ha’u sai ona husi uma hodi mai faan manutolun iha Taibesi, no hein too hotu maka hau fila ba uma, dala ruma hau too uma kalan,” nia konta.

Nia informa, iha situasaun normal manutolun rak 1 ema bele sosa hotu, maibé agora nee susar tebes no dala ruma too kalan mós ema la sosa.

Preokupasaun hanesan hatoo mós husi, Martino da Silva, neebé duante nee faan nuu iha Jardin Motael.

Nia dehan, iha situasaun estadu emerjnesia no konfinamentu obrigatriu nee halo ema ladun sosa sira nia nuu.

“Loron babain ema barak mai olaraga iha fatin nee no sira sempre sosa nuu, maibé agora laiha ema atu sosa. Polisia sempre duni ami, maibé ami kontinua faan tanba ho ida nee maka ami bele hetan osan,” tenik nia.