Aldei neen ne’e iha suku Manleuana Postu Administrativu Dom Aleixo no suku Kamea Postu Administrativu Cristo Rei, tanba Governu seidauk halo kanalizasaun.
Xefe aldeia Lau-Lora, suku Manleuna, António dos Santos, hateten durante tempu naruk komunidade susar atu asesu bee moos tanba de’it depende bá bee matan ne'ebé beiala sira uza to’o ohin loron.
"Iha ne'e ami aldeia haat mak depende de'it ba bee matan. Aldeia haat ne’e mak hanesan Lau-Lora, Manleuna, Mauk no Ramelau," nia informa ba jornalista via telefone horisehik (01/09).
Iha fulan kotuk, komunidade sira preokupa tebes bá bee moos tamba hetan estragu husi inundasaun iha 4 abril.
Hafoin akontesimentu inundasaun, hetan duni apoiu husi Plan Internasionál no mós CVTL atu oferese bee, maibé agora husi parte hirak ne'e foti ona tanke no komunidade depende fali ba bee matan.
Autoridade lokál halo ona proposta ba Bee Timor-Leste Empreza Públiku ( BTL.Ep) atu apoia bee tanke, maibé la sufisiente tanba komunidade barak.
Iha parte seluk, Xefe suku Manleuana, Jacob Tilman Soares, reforsa katak, aldeia haat ne'e Governu seidauk dada bee moos, tanba komunidade balun iha foho leten susar duni atu halo kanalizasaun.
Tanba ne’e, BTL.Ep presiza halo identikasaun ba suku no aldeia sira ne'ebé seidauk asesu bee moos nune'e bele resolve.
Nune’e mós Xefe Suku Kamea, Matos da Costa, hateten aldeia rua iha suku ne’e to'o oras ne'e komunidade kontinua kuru bee matan tanba distánsia dook kuaze kilómetru rua.
"Parte munisipu Dili tau ona osan iha programa prioridade orsamentál 2022 no Planu Dezenvolvimentu Nasionál (PDN)," nia dehan.
Komunidade ihaa ldeia rua husi suku Kamea hamutuk 2.234 no uma ka’in hamutuk 411, alende ne’e suku Manleuna ho nia aldeia Lau-Lora iha komunidade hamutuk 378.
Iha suku Manleuana ho nia aldeia Lau-lora, totál komunidade 2.612 seidauk konta ho Aldeia Manleuana, Mauk no Ramelau.
