Ministru Administrasaun Estatal, Miguel Pereira de Carvalho informa, ba proposta OJE 2022, MAE hatama ona proposta orsamentu Munisipiu Atauro nian ba Ministériu Finansas (MF).

Maske nune’e, Ministru ne’e la fó sai orsamentu hira mak nia propoin ba munisipiu Atauro.

“Atauro nia osan ita hein lai tanba Komisaun Revizaun Orsamental Politika seidauk halo desizaun, entaun ha’u seidauk bele pronunsia bu’at ruma iha ne’e, bainhira komite revizaun orsamentu kuandu pronunsia ona hafoin ha’u bele hateten buat ruma,” dehan Ministru hafoin reuniaun Konsellu Ministru iha Palasiu Governu, Kuarta (15/09).

Iha semana liu ba, Ministru Miguel informa, MAE propoin millaun $2.5 ba KROP. Osan ida ne’e ba administrasaun de’it.

Molok ne’e, Primeiru Ministru Taur Matan Ruak husu ba Administradór no xefe suku sira iha Atauru atu servisu hamutuk MAE hodi aprezenta orsamentu iha proposta OJE 2022, tanba sei tau Atauro nia osan ketak.

“Ha’u espera Ministru Administrasaun sei esforsu atu aprezenta ona orsamentu iha Orsamentu Jeral Estadu tinan 2022,” dehan PM Taur hafoin dialogu ho Xefe Suku sira, iha Salaun Administrasaun Atauru, 11 Juñu liu ba.

Bainhira Atauro sai munisipiu, signifika TL sei iha Munisipiu 13, inklui Rejiaun Administrativu Espesial Oekusse-Ambeno.