Sekretariu Rejional asuntu Saúde, RAEOA, Luis de Jesus Neno informa, bazeia ba dadus ne’ebé iha, iha fulan Marsu no Abril ema na’in 80 mak asu tata.

Husi na’in 80 ne’e, nia dehan, na’in 13 mak hetan sintomas raiva.

"Sidadaun sira ne’ebé hetan tata husi asu daudaun ne’e hala’o hela tratamentu no hetan atendimentu rutina husi profissional saúde," dehan Luis liu husi WhatsApp, Kuarta (17/04).

Pasiente hirak ne’ebé asu tata, nia dehan, profissional saúde sira iha postu saúde, sentru saúde no iha ospital rejional Oekusse, atende tuir mata-dalan ne’ebé  iha.

“ Pasiente sira ne’ebé hetan tata husi asu ne’e ami fó atendimentu espesial no bainhira mosu sintomas ami fó atendimentu, no pasiente sira asu tata ne’e hotu-hotu hetan vasinasaun," dehan nia.

Molok ne’e, tuir dadus husi Diresaun Nasional Veterinaria, Ministériu Agrikultura, Pekuaria, Peska no Floresta, asu ualu iha Rejiaun Administrativu Espesial Oekusse-Ambeno mak pozitivu raiva.

Diretóra Nasional Veterinaria, MAPPF, Joanita Bendita da Costa Jong informa, durante hala’o vasina ba animal iha RAEOA, husi asu sia (9) ne’ebé ekipa foti nia amostra hodi halo teste, asu ualu (8) mak pozitivu raiva.

“Ekipa halo vasina ba animal no sira deteta asu ualu mak pozitivu raiva,” informa Joanita, iha nia knar-fatin, Komoro, Tersa (16/04).

Daudauk ne’e, nia hatutan, iha fatin balun ne’ebé konsidera sai hanesan area risku ba raiva.

"Ita konsidera moras raiva ne'e hanesan area risku, ba mean ona, tanba moras ne'e espaila husi Pasabe to'o Pante Makasar, iha suku Lalisu, Bometo no Naimeko, tanba ema muda asu husi fatin ida ba fatin seluk," dehan Joanita.

Daudauk ne’e, nia hatutan, ekipa kontinua halo vasina ba animal sira iha RAEOA no atinze ona porsentu 71 resin.