Reitór Universidade da Paz (UNPAZ), Adolmando Amaral, konsidera governu AMP fó servisu ba asesór nasionál no internasionál besik 10.014 tanba membru governu barak laiha kapasidade.

“Presiza asesór barak atu fó pareser ba sira tanba kulpa husi partidu tolu ne’ebé forma governu”, dehan nia, iha servisu fatin, Kampus UNPAZ, horisehik.

Nia dehan, presiza ema sira iha kapasidade mak lidera ministériu atu bele konsentra ba polítika no planu prioridade sira, tanba laiha rekursu obriga-aan hodi kontrata asesór barabarak ikus mai fó pareser mós la loos hodi solusiona problema povu nian.

Bainhira iha remodelasaun, tuir nia, presiza hasai ministru sira ne’ebé laiha kapasidade nune’e bele hamenus asesór.

“Primeiru ministru tenke haree ministériu ko'alia barak servisu la la’o, duke ema ne’ebé la ko'alia barak maibé servisu la’o”, tenik Adolmando.

Nia dehan kritériu tenke hatene situasaun Timor nian no mós atu sai asesór presiza hatene atu ba fatin ne’ebé, labele haree kór partidu hodi manan osan boot maibé ezekusaun la di’ak.