Movimentu Universitáriu Timor-Leste (MUTL) kontra desizaun Parlamentu Nasionál ne'ebé deside hodi kontinua halo akizisaun viatura foun no leilaun ba karreta prado tuan ne'ebé Deputadu III Lejizlatura sira uza.

Portavós MUTL, Daniel Ximenes, husu ba Konsellu Administrasaun Parlamentár atu kansela imediata akizisaun karreta foun no uza kompeténsia hodi rekolla hikas prado tuan husi eis-deputadu sira, nune’e bele distribui ba deputadu atuál sira uza halo servisu.

Bainhira Parlamentu Nasionál la muda polítika ne’e, MUTL sei organiza públiku sosiedade tomak atu tun halo manifestasaun hasoru Parlamentu Nasionál.

“Ami seidauk determina sá loron mak atu halo asaun pasifika, mais agora daudaun ne’e sei iha hela prosesu tanba sei halo hela preparasaun”, dehan Daniel, iha Dili, horisehik.

Nia mós konsidera polítika sosa karreta foun nu’udar despeza ne'ebé laiha retornu ba Estadu no povu. Ne’e duni, prefere atu Deputadu IV Lejizlatura sira kontinua uza karreta tuan hodi hala’o servisu.

Polítika deputadu sira nian, tuir nia, nu’udar forma traisaun ba povu nia rekursu no prinsípiu luta ba libertasaun. Realidade lider sira ne’e liberta uluk sira nia-aan, família, grupu no partidu.

Estudante sira rejeita polítika ne’e tanba bele prejudika ba osan povu nian ne'ebé hetan de'it biliaun $16.5 iha banku federál.

Nune’e, sira mós preokupa ho kondisaun Timor-Leste nian ne’ebé agora sai nasaun devedór. Tanba ne’e, Estadu tenke iha responsabilidade hodi halo jestaun di'ak, transparénsia no kontabilidade, ne'ebé iha sustentabilidade atu labele fó todan ba jerasaun foun sira iha futuru.

Entretantu, portavós Prezidente Parlamentu Nasionál, Deputada Lídia Ana Bela, rekoñese katak MUTL halo ona karta petisaun ba Parlamentu Nasionál atu halo kanselamentu ba desizaun Konsellu Administrasaun Parlamentár nian kona-ba akizisaun viatura foun.

Nune’e, Asesora Média Prezidente PN, Nilva Guimarães hatete, Prezidente PN, Aniceto Guterres simu ona karta petisaun MUTL nian.

Nia hatutan, lei fó dalan ba sidadaun individuál ka grupu halo asaun pasifika bainhira la konkorda ho desizaun polítika ruma, maibé tenke asegura mós estabilidade nasionál hodi garantia liberdade ema seluk nian.