Nia rekoñese liafuan barak iha públiku balun dehan tendénsia liu ba partidu, família no balun dehan liafuan oioin maibé tuir Arsenio katak Oekusse tenke sai hosi izolamentu,  kontinua hanoin ne’ebé  Mari Alkatiri rai hela no kontinua misaun Timor-Leste atu liberta povu.

“Se de’it mak dehan ha’u ba grupu ida, ba grupu ida, ha’u simu de’it no ha’u hakarak rona ema ko’alia maibé importante mak ba atu halo saida ba Oekusse, no ita tenke halo estrada ba komunidade sira no aumenta tan eskola iha Oekusse, be moos ita bele halo ka la’e, importante mak Oekusse labele izola tan tinan neen liu ba no labele izoladu ona,” hatutan Arsenio, hafoin simu posse husi Primeiru Ministru Taur Matan Ruak, Sesta (12/6), iha Palacio Governu.

Membru partidu FRETILIN ne’e konsidera mandatu politika la’os importante, maibé oinsá maka Oekusse tenke ba oin.

Nia hatete, nia mandatu depende ba atuál Primeiru Ministru Taur Matan Ruak. Tuir nia, mandatu TMR remata nia mós mandatu remata.

“Kuandu oitavu governu sei iha, Primeiru Ministru ne’e sei iha, ha’u nia mandatu mós sei metin, primeiru ministru nia mandatu bainhira mak remata ha’u mós remata” hatete eis Sekretáriu Rejionál RAEAO ne’e iha primeiru dada lia ho Jornalista hafoin simu pose ba Prezidente RAEOA iha Palasiu do Governu  sesta (12/06).

Entretantu husi nia planu, sei forma ekipa ida ba sekretáriu rejiaun urjente no semana oin sei aprezenta ba Primeiru Ministru atu bele iha ona autoridade, labele iha prezidente ida laiha sekretáriu rejiaun.

“Ami sei prioridade nafatin, ohin primeiru ministru mós dehan ona, no eis prezidente autoridade Mari Alkatiri hanorin ami barak ona no ideia barak atu halo servisu loloos, katak infraestrutura tenke kombina ho edukasaun saúde tenke la’o maka’as” tenik tan.

Nia promete sei kontinua servisu maka’as hodi rezolve problema sira ne’ebé mak akontese iha Mari Alkatiri nia mandatu no seluk tan, hanesan mós Ro Haksolok.

“La’ós problema rua de’it problema barak tebes, ki’ak, Mal-nutrisaun, asesu ba eskola no bee moos ne’e hanesan problema hotu-hotu, no Hotel Oe-Uku ita tenke kontinua halo hotu  ka sei finaliza, tanba agora sei uza ba kuarentena, maibé sei finaliza tanba hotel ne’e tenke halo hodi atrai ema hotu tanba ida ne’e ohin primeiru ministru dehan ona sei servisu governu sentrál ninian”.

Presidente REAOA, Arsenio Bano nia mandatu sei remata iha tinan 2022.