Diretór Jerál Ministériu Edukasaun no Kultura (MEK), Antonino Pires hateten, hafoin akontese anin boot sira simu informasaun iha eskola 100, maibé depois halo verifikasaun identifika eskola 80 mak hetan impaktu husi hahalok natureza ne’e.

“Ho akontesimentu hirak ne’e mak ministériu edukasaun no kultura uza nia kbiit rasik hodi fó apoiu imediamente lona ba munisípiu ne’e hodi halo tenda ba prosesu aprendizajen”, dehan nia, iha servisu fatin, Vila-Verde, horisehik.

Nia hatutan, iha munisípiu Ainaru, iha informasaun foun katak katak eskola ne’ebé taka ho lona anin loke fila-fali. Maski nune’e, prosesu aprendizajen kontinua la'o nafatin.

Tuir diretór jerál, problema ne’e boot tebes, nune’e ministériu sei halo pedidu ba primeieu ministru (PM) atu bele hola desizaun ba akontesimentu ne’e, liuliu oinsá sosa materiál konstrusaun ba eskola hirak ne’e.

Saida mak ministériu bele halo maka haruka fó apoiu emerjénsia ba eskola ne’ebé hetan estragu totál hodi fó lona atu bele taka kakuluk uma nian, nune’e bele kontinua nafatin prosesu aprendizajen.

Ema Na’in Tolu Mate

Antes ne’e, Ministériu Solidariedade Sosiál (MSS) hasai relatóriu katak dezde inisiu tinan 2018 mosu dezastre naturais oioin iha nasaun, hahú husi udan boot, anin boot no ahi han uma. Husi akontesimentu hirak ne’e hotu rejista kazu 1.960 no ema na’in tolu mate.

Dadus provizóriu husi Diresaun Nasionál Dezastre no Solidariedade (DNDS), Ministériu Solidariedade Sosiál (MSS), dezastre naturais ne’ebé akontese kuaze iha munisípiu hotu-hotu.

Vítima na’in tolu ne’ebé lakon vida tanba dezastre rejistradu ida husi postu administrasaun Luru, Munisípiu Lautem, no rua seluk husi postu administrativu Atsabe, Munisípiu Ermera.

Nune’e, husi kazu 1.960 ne’ebé rejistu hetan ona apoiu umanitária husi governu, liuhusi Ministériu Solidariedade Sosiál (MSS).

Liña Eletrisidade Kotu

Nune’e, relatóriu husi parte Eletrisidade Timor-Leste (EDTL) fo sai katak, rai udan no ain boot ne’ebé akontese iha fulan Janeiru nia laran fó impaktu makaas ba distribuisaun liña eletrisidade labele lakan normál iha munisípiu neen (6).

Anin boot ne’e halo ai boboot lubuk ida tohar monu hakotu fiu eletrisidade iha fatin balun no hanesan munisípiu Dili, Lospalos, Baukau, Aileu, Ainaru, Ermera no Bobonaru ahi lakan la normál.

Ekipa Eletrisidade Timor- Leste (EDTL) koloka ona tékniku sira ba hadi'a liña distribuisaun enerjia eletrisidade.

Situasaun natureza ne’e afeta ba liu-liu liña distribuisaun iha kuaze munisípiu hotu-hotu. Anin boot mai kuaze mosu iha munisípiu 12 inklui Dili halo ahi lakan la normál.

Liña distribuisaun grave liu ba iha Munisípiu Ainaru ne’ebé to’o ohin loron ahi seidauk lakan, Ermera no Aileu ahi foin lakan fila fali.

Aleinde ne’e, iha munisípiu Bobonaru iha Postu Administrativu Lolotoe besi riin eletrisidade nian balun to’o oras ne’e problema boot no ekipa tékniku ba hadi'a hela liña distribuisaun.

Iha EDTL Baukau iha suku balun hanesan, Afaloikai, no Postu Administrativu Venilale mós ahi mate no agora tékniku sira hadi'a hela.

Parte seluk iha Lospalos, iha Luru suku ida grave hela ho Iliomar tékniku sira tenta rezolve hela atu hadi'a fali ahi bele lakan.