Prezidente PN ne’e dehan, nia hasoru-malu ona ho Primeiru Ministru Taur Matan Ruak hodi aproveita komprimenta no koalia mós kona-ba planu lejizltiva iha tempu restu husi Janeiru to'o lejizlatura foun mosu.
Tanba, nia hatutan, tanba governu iha inisiativa ba proposta lei ruma atu hatama karik, Parlamentu Nasionál hakarak hatene di'ak liu atu bele ajusta nia kalendáriu lejizlativa.
Entaun, nia hatutan, presopostu ba kalendáriu lejizlativa Parlamentu Nasionál nian ne'e inklui inisiativa PN ho inisiativa husi governu.
“Ohin reniaun ho Primeiru Ministru, nível Xefe governu nian ami hato'o de'it atu halo ajustamentu, maibé orsida Prezidensia Konsellu Ministru no Ministru Asuntus Parlamentares, ami sei halo reniaun liña koordenasaun ida ho meza komisaun espesializada iha 26 Janeiru ne'e,” informa Aniceto, hafoin reniaun ho PM Taur iha Parlamentu Nasionál, Segunda (16/01).
Hatan kona-ba oinsá ho proposta alterasaun Lei Pensaun Vitalisia, nia informa, proposta alterasaun LPV ne’e inklui hotu iha laran.
“Inklui hotu, lei ne'ebé mak iha tiha ona no lei ne'ebé mak ita-boot temi (LPV) tama iha Parlamentu Nasionál, antes ha'u asume Prezidensia Parlmentu ninian, ohin hau hatete ba Primeiru Ministru mós lei ne'ebé mak tama tiha ona ne'e, ami tenke rezolve hotu, sei la kaduka. ami tenke rezolve hotu, aprova ka la aprova depois haruka ba Prezidente Repúblika veto ne'e,” dehan nia.
Nia afirma, PN presiza kalendáriu ajustamentu, tanba Proposta Lei sira iha Komisaun espesializada sira ladún barak ona, tan ne’e se PN nia ritmu servisu hanesan ho tinan 2022, fulan tolu tán bele rezolve ona proposta lei sira ne'ebé mak tama tiha ona.
“Ha’u dehan la barak ne'e la to'o 10,” dehan nia.
Molok ne’e, Prezidente Komisaun A trata asuntu Konstituisaun no Justisa, Joaquim dos Santos hatete, Komisaun A sei ajenda diskusaun ba alterasaun Lei Pensaun Vitalisia iha tinan 2023 nia laran.
“Ha'u dehan Janeiru se la’e Fevereiru ami tenke diskuti, tanba desizaun so iha korum, laiha korum, desizaun laiha,” dehan nia iha 22 Dezembru 2022.
Tuir Joaquim, durante ne’e Komisaun A pendente diskusaun ba lei sira ne'e tanba korum laiha.
