“Ha'u hanoin seidauk iha ema ida mak bele ko'alia ho ha'u-nia kompadre Xanana Gusmão. (Maibé) ha'u-nia esperansa nafatin ba ha'u-nia kompadre”, dehan Alkatiri hafoin soru-mutu ho prezidente timoroan, Francisco Guterres ‘Lú-Olo’, iha Palasiu Prezidensiál Ai-Tarak Laran, horisehik.

Entretantu, komunikadu ne’ebé fó sai husi partidu FRETILIN hateten, haree husi rezultadu eleisaun nian povu hakarak hakle'an liu tan entendimentu insidénsia parlamentár ne’ebé hahú husi 2012/2013 ho konsekuénsia formasaun VI Governu Konstitusionál iha kontestu entendimentu entre CNRT/Bloku Koligasaun ho FRETILIN.

Nune’e, Estabilidade tenke habelar mós ba relasaun entre Órgaun Soberania hotu-hotu, liuliu ba Prezidensiál Repúblika iha ninian relasaun ho Parlamentu Nasionál no ho Governu.

Ba Parlamentu Nasionál hanoin katak tenke fó mós kbiit foun no sei lori mós preokupasaun no aspirasaun oioin liuhusi PLP no KHUNTO.

Nune’e, PD konsege mantein nafatin nia pozisaun iha PN, no ida ne’e hatudu katak partidu ida ne’e iha votante metin no ita tenke konsidera nafatin sira nu'udar partidu i da ne'ebé merese konsiderasaun.

“Nune’e, ita iha senáriu foun ida, ho variavel foun. Tanba ne’e, importante ba ita atu hetan denominadór komún ida. Ida ne’e mak ita nia dezafiu daudaun, ne'ebé hamutuk ita tenke hatene hasoru”, tenik Alkatiri.

Xanana Soe Desizaun Ba Konferénsia Nasionál

Entretantu, Prezidente CNRT, Kay Rala Xanana Gusmão rasik to’o agora seidauk fó resposta ruma ba ‘pedidu’ partidu FRETILIN nian.

Desizaun partidu CNRT nian ba formasaun governu sei entrega ba delegadu konferensista partidu sira mak foti desizaun ba destinu forsa polítika ne’e nian ba oin.

Sekretáriu Jerál CNRT, Francisco Kalbuadi Lay dehan, konferénsia nasionál sei hala'o iha Sesta (4/8) no Sábadu (5/8).

“Depois iha ne'ebá mak foin fó sai rezultadu halo nusa. Tenke respeitu ba konferensista sira nia desizaun,” tenik Kalbuadi.

Tanba ne’e, nia parte dehan atu halo koligasaun seidauk, tanba Sekretáriu Jerál Partidu FRETILIN mós foin mak mai hasoru malu ho Xefe Estadu.

Lakohi Eleisaun Antesipada mas Lakohi Koligasaun

Entretantu, Partidu Libertasaun Populár (PLP) lakohi atu iha eleisaun antesipada, maski nune’e, partidu ho kadeira ualu iha Parlamentu Nasionál ne’e mós lakohi atu halo koligasaun ho partidu boboot sira hodi forma governu.

Vise Prezidente PLP, Fidelis Magalhães hateten, kona-ba atu halo koligasaun sira ko'alia fila-fila pozisaun mak iha opozisaun.

“PLP iha kompromisu eleitorál. PLP iha ninia programa rasik atu oinsá bele lori ba oin programa polítika PLP nian”, tenik nia.

Nia esplika, kompromisu eleitorál PLP nian la’ós atu fahe kadeira ba malu entre PLP ho partidu sira seluk.