Tuir Koordenador AMN, Gaspar Margono hateten, dezenvolvimentu ohin loron ho karakter implika tebes injustisa rekursu iha Timor-Leste.
"Lala’ok dezenvolvimentu ohin-loron ne’ebé ho karáter top down ka husi leten ba kra’ik implika distribuisaun injustu ba rekursu Timór nian. Maske Konstituisaun RDTL rasik konsagra iha ninia artigu 6 katak, Estadu tenke halo distribuisaun justa ba soin Timór nian, atu nune’e, povu hotu-hotu bele senti moris ho dignidade no saudável,"dehan nia liu husi Komunikadu ne’ebé Online INDEPENDENTE asesu, sesta ne’e (21/10).
Nia dehan, PN la foti desizaun ne’ebé inpoin husi leten ba kra’ik hodi ema hotu subordina. La iha demokrasia partisipativu, maibé iha mak demokrasia ba elite minoria, aliás ditadura dos elites.
"Tinan 20 Timor-Leste independente, maibé povu maioria mak sei moris iha liña pobreza ne’ebé estremu, malnutrisaun, dezempregu, sistema saude ne’ebé la adekuadu no setór edukasaun ne’ebé la iha kualidade", afirma nia.
Tuir nia, rezultadu husi dezenvolvimentu ekonomia-polítika ne’ebé la’o hela iha Timor-Leste, iha ne’ebé despeza públika la fó benefisiu ba povu maubere nia interese, maibé ba hakonu de’it klase elite balun nia kán no nia interese.
Gaspar haktuir, iha loron tolu (03) fulan outburu tinan ne'e, Parlamentu Nasionál (PN) foti desizaun polítika ida hodi integra planu sosa karreta pajero no laptop iha sira-nia orsamentu privativu tinan rihun rua, ruanulu resin tolu (2023).
Nia dehan, desizaun ida-ne’e, tuir Aliansa Maubere Nasional nia haree, la reflete interese povo hotu-hotu nian. Politika ne’e la’os foin mak akontese, maibé polítika sosa no sa’e karreta luxu sai ona toman ida iha ukun ohin-loron nian.
"Desizaun ida-ne’e hatudu situasaun ida ne’ebé ita-hotu tenke nota, iha sorin-ida, eziste elite ne’ebé kaer poder hodi hakonu sira-nia interese, no sorin-seluk, eziste povu (traballadór, ambulante, agrikultór, ki’ak-sidade, nsst) ne’ebé moris terus, susar, subordinadu no marjinál iha sosiedade Timor-Leste. Ne’e hatudu katak elite ho povu maubere nia interese kontraditóriu," tenik nia.
Ho nune'e, portavós ne'e Konsidera Politika husi PN ne'e hanesan Elite hanehan povu maubere, desde uluk até agora. Liuhusi Estadu, elite sira akumula soin, enkuantu povu maubere asesu ka hadau de’it nia restu.
"Ami nu’udar Aliansa Maubere Nasionál, ne’ebé kompostu hosi organizasaun sosiál no setór masa sira-seluk hanesan ambulante, ki’ak-sidade, agrikultór, traballadór, no seluk tan, Ami nu’udar povu maubere hakarak afirma no ezije,
1). Ami, povu agrikultór, ambulante, kamponés, ki’ak-sidade, traballadór, estudante no joven reprezenta lian-laek sira seluk, rejeita totál desizaun Parlamentu Nasionál nian kona-ba sosa karreta pajero no laptop ba deputadu/a sira.
2). Ami ejize atu Parlamentu Nasionál, liuhusi diskusaun plenária ba Orsamentu Jerál Estadu [OJE], atu elimina planu sosa karreta-foun no laptop.
3). Ami husu ba Prezidente Repúblika atu tetu didi’ak OJE molok promulga, ami hanoin katak di’ak liu veta kuandu Parlamentu Nasionál la altera dotasaun orsamentál kona-ba sosa karreta-foun no laptop.
4). Ami husu atu despeza Estadu nian tenke aloka barak ba setór estratéjiku sira ne’ebé fo benefisio ba interese povu maubere nian.
5). Ami husu atu sosiedade, estudante sira no povu maubere hotu atu konsiente katak ita moris iha dominasaun foun [neo-kolinializmu no neo-liberalizmu], iha ne’ebé elite sira supa no hariku-an liuhusi dalan legál.
6). Ami husu ba movimentu hotu-hotu, setór sira hotu ne’ebé luta ba justisa, atu hamriik no hamosu asaun-masa ida hasoru ukun ditadura-osan nian, aliás ditadura elite nian.
"Ikusliu, ami hakarak dehan katak durante ne’e despeza públika só hakonu de’it elite sira-nia kán no interese, hanesan polítika regulár sosa-karreta, direitu regalia no priviléjiu sira. Ba sosiedade tomak, ita presiza hanoin, tetu, krítiku, no nesesáriu hamosu asaun-masa hodi kontra injustisa iha ita-nia rai ida-ne’e," hakotu nia.
