Dosente husi Universidade Dili, Hugo Lorenço hatete, durante loron 120, Ministru Justisa (MJ) halo esforsu lubuk ida hodi rezolve problema kaderneta pasaporte.

"Ohin loron kaderneta pasaporte iha ona, ida ne’e hatudu katak esforsu husi Ministru  Justisa ho nia rekursu tomak ne'ebé mak nia iha ho ekipa konsege rezolve problema kaderneta pasaporte ne’ebé durante ne’e ema hotu-hotu preokupa," dehan Hugo via telefone, Segunda (20/11).

Hugo hato'o parabéns ba Ministru Justisa, tanba ezerse nia servisu ne’ebé todan ho responsabilidade masimu no ikus konsege rezolve.

"Ita fó parabéns ba Ministru Justisa, tanba ezerse nia servisu ida ke todan duni, liu-liu pasaporte, tanba ida ne’e responsibilidade Ministru Justisa nian, mosu duni dezentimentu iha entervista, maibé to’o ikus nia konsege rezolve," dehan nia.

Entretantu, promesa husi Ministru Justisa, Amandio de Sa Benevidas, kona-ba kaderneta pasaporte rihun 16 konsege realiza duni. Iha 16 Novembru, horseik, aviaun Qantas-Australia hatuun ona kaderneta pasaporte iha aeroportu internasionál Nicolau Lobato Komoro.

Hafoin aviaun transporta kaderneta ne’e to’o iha aeroportu, pasaporte hirak ne'é lori ba Diresaun Jeral Servisu Notariadu.

Diretor Jeral Servisu Rejistu Notariadu, João Fernando Martins Borges informa, pasaporte rihun 16 to'o ona no nia parte sei organiza atu halo atendimentu ba publiku iha 22 Novembru.