Ai-moruk Iha SAMES Sufisiente Featured

By Martinha Gusmão Maiu 07, 2023 274
Aimoruk. Foto:Dok/INDEPENDENTE. Aimoruk. Foto:Dok/INDEPENDENTE.

DILI: Daudaun ne’e estoke ai-moruk  iha Servisu Autónomu, Medikamentu no Ekipamentu Saúde, Institutu Públiku (SAMES-IP), sufisiente hela hodi halo distribuisaun bá fasilidade saúde sira iha territóriu nasionál.

Diretór Armazenamentu no Distribuisaun SAMES, Octávio Fernandes hateten, estoke ai-moruk iha SAMES iha hela 87% no estoke out 33%, signifika ai-moruk sufisiente.

Ai-moruk ne’ebé SAMES iha, kategoria ba parte tolu hanesan ai-moruk vital iha 106, essensiál iha 230 no estoke ne’ebé iha hamutuk 178, daudaun ne’e item 50 mak laiha no mós nessesáriu hamutuk 107.

“Ai-moruk vitál ne’e importante tebes hodi salva ema nia vida liu-liu ba emerjénsia inklui item rua seluk ne’ebé SAMES iha totál 350. Entaun totál item stock on hand hamutuk 306 ho porsentu 87 no total item stock out iha 44 ho porsentu 13,”  nia hateten iha knaar fatin Kampu-Alor, Tersa (02/05/2023).

Ho nune’e SAMES buka meius oi-oin atu ai-moruk kategoria tolu ne’e estoke labele out iha armajén.

Iha fatin hanesan, Diretór Aprovizionamentu SAMES, Nelson Correia esplika, iha kompañia 23 mak halo akizasaun ai-moruk husi kompañia mai SAMES, akizasaun ne’e la’o tiha ona, falta kompañia balun sei iha prosesu asina kontratu.   

“Akizasaun ba tinan ida-ne’e la’o tiha ona, iha kompañia hamutuk 23, iha lubuk ida mak asina ona kontratu, maibé iha kompañia ida ka rua mak seidauk maibé iha ona prosesu,” nia dehan.

Asina kontratu ne’ebé SAMES ho kompañia sira halo ho valór la hanesan liu-liu produtu vitál iha kontratu tolu, ai-moruk nesesáriu iha haat, essensiál iha kontratu tolu, ai-moruk espesiál iha kontratu tolu, produtu fase raan iha kontratu ida, oksijéniu kontratu ida inklui sira seluk.

Tanba, kompañia hirak ne’ebé manán tenderizasaun husi nasionál no internasionál iha hotu.

Kona-bá prossesu ka durasaun tempu normálmente loron 60 ka 90 ai-moruk bele to’o Timor, dala barak impede husi situasaun natureza nian.         

Iha tinan 2023, orsamentu ne’ebé Ministériu Saúde aloka ba SAMES ho total millaun $5.2 no orsamentu uza ba akizasaun ho total millaun $3.7, daudaun ne’e sei falta millaun $1 iha konta bankária SAMES nian.

Rate this item
(0 votes)

Independente Digital TV