“Ami apresia tebes ba Parlamentu Nasionál sira nia hanoin ne’ebé di'ak, ho laran luak aumenta osan subsidiu husi dolar emerikanu $30 hasa’e ba $50 kada fulan, tanba ita hatene katak ema ho defisiénsia no idozu sira mak moris vulneravel liu, no mós iha situasaun Covid-19, sira hetan grave liu tan,”dehan nia iha konferensia imprensa, iha edifisiu AHMDTL, Manleuana, Dili, tersa horseik (14/12).

Nune’e, liu husi aumenta osan subsidiu ne’e bele responde ona nesesidade ema ho defisiénsia na’in 38.118.

Tuir nia, ho subsidiu $50 kada fulan ne’e, parese ema ho defisiénsia ho idozu sira senti kontente ona, tanba reprezentante povu sira nia hanoin di'ak ba ema ho difesiénsia no idosus sira nia nesesidade.

Nia akresenta, Parlamentu Nasionál sira aprova aumenta subsidiu ne’e, tanba sira tun ba halo fiskalizasaun ba ema ho difesiénsia no idozu sira barak mak moris terus, balun hahán laiha no osan ne’ebé sira simu balun uza la to'o.

Enkuantu, ema ho defisiénsia no idozu sira iha 12 munisipiu inklui Rejiaun Administrativu Espesial Oecuse Ambeno (RAEOA), durante ne’e hein hela bainhira los mak osan subsidiu ne’e bele aumenta, maibé agrades tanba Deputadu sira iha Parlamentu Nasional bele aprova ona.

Ho nune’e, AHMDT apreseia mós ba Deputadu Antonio Benevides no Deputadu Mariano Asanami Sabino, ne’ebé sai komponente ba proposta ne’e.

Tanba  ne’e, AHMDT husu mós ba Prezidente Repúblika atu promulga orsamentu ba idozu no invalides sira atu nune’e, ho orsamentu no subsidiu ida ne’e bele responde netik ba ema ho difesiénsia no ferik katuas sira nia  nesesidade.

Entretantu, AHMDTL husu atu aumenta subsidiu ne’e implementa iha tinan 2022 no labele adianta tan, tanba ema ho defisiénsia no ferik katuas sira hein hela informasaun no implementasaun ba aprovasaun ne’ebé halo ona iha loron hirak liu ba.

Asistente Editor: Saturnina da Costa