Saudozu hakotu-iis iha loron 28 fulan-Outubru tinan 2021, iha Brisbane Australia.
Bainhira, aviaun to’o iha aeroportu, ahu kdesan Saudozu Max Sthall, simu ho parada militar no tradisaun kultura Timor nian, hafoin familia entrega direita Ahu Kdesan ba Lider Karismátiku Kay Rala Xanana Gusmão no Laureado Nobel da Páz hanesan mós Eis Prezidente Repúblika, José Ramos Horta no kontinua entrega ba Estadu liu husi Ministru Prezidensial Konsellu Ministru, Fidelis Manuel Leite Magalhães.
Saudozu Max Sthall nia Ahu-Kdesan husi Australia mai Timor-Leste akompana husi Saudozu nia Espoza Ingrid Bucens ho nia oan no família balun.
“Lori Primeiru Ministru nia naran ho onra bo'ot ba ita hotu ne'ebé halibur iha ne'e bele fó netik biban hodi simu Saudozu Max Sthall nia Ahu-Kdesan no ita koñese Saudozu ho domin ba ita hotu, no mós ita hotu ne'ebé hamrik iha ne'e mak goja ukun rasik aan ida ne'e, tanba nia mak fó sai ita nia situasaun no historia ba mundu,” dehan Ministru Prezidensial Konsellu Ministru, Fidelis Leite Magalhães, iha Aeroportu Internasional Nikolau Lobato, kuarta ne’e.
Governante ne’e, husu ba ema hotu atu fó apresiasaun ba Saudozu nia servisu, sakrifisiu no dedikasaun ne’ebé halo ona ba rai ida ne’e, no fó ona kontribuisaun hodi halo istória bo’ot bá nasaun Timor-Leste liu-liu iha akontesimentu masakre Santa Krúz, iha loron 12 fulan-Novembru 1991, husi nia filmázem konsege loke mundu nia matan bá luta nasaun nian.
Enkuantu, tuir observasaun Jornalista Online INDEPENDENTE iha terenu nota katak, instituisaun públiku no privadu, organizasaun rezisténsia, sosiedade sivil, no mós seguransa sira, nakonu iha aeroportu hodi simu saudozu nia Ahu-Kdesan.
Hafoin, lori Saudozu Max Sthall nia Ahu Kdesan la’o haleu Dili laran, komesa husi ponte CPLP ba Bidau no ba Taibesi, hafoin lori ba fatin deskansa iha Sentru Audiovizual Max Sthall Timor-Leste (CAMSTL), Benefica.
Entretantu, Saudozu MAX Sthall nia Ahu Kdesan, sei ba haloot iha Semiteriu Santa Cruz, iha loron 17 fulan-Dezembru tinan ne’e.
Asistente Editor: Saturnina da Costa
