“Max Stahl nia koragem no dedikasaun iha mundu jornalizmu sai nu’udar ezemplu boot tebes ba jornalista foun timororan sira hodi nafatin luta kontra dezumanidade iha rai ida ne’e,”dehan TLPU no AJTL liuhusi komunikadu ne’ebé Online Independente simu.

Organizasaun jornalista rua ne’e hateten, Max Stahl nudar mahon ba jornalista timororan sira, sente lakon erói boot. Tanba ne´e asosiasaun rua fó omenajen ba eroi loloos, ba defensor direitus umanu, liberdade imprensa no espresaun ida ne´e.

Liuhusi meiu ne’e, TLPU ho AJTL hato’o mós sentida kondolénsia ba família enlutada sira. “Hato’o dala ida tan ami-nia sentidu pézames ba família matebian jornalista Max Stahl ne’ebé husik ona mundu iha 28 outubru 2021 iha Austrália, tanba moras onkolójika ka kánkru ne’ebé mak nia sofre tinan barak nia laran”.

TLPU ho AJTL husu ba estadu atu kontinua garante liberdade expresaun no imprensa iha Timor-Leste, tanba Max Stahl nia luta mai ho baze jornalizmu maka hafanun mundu kona-ba asaun kruel invazór sira nian, promove no prezerva obra husi jornalista Max Stahl.

Inklui, apoiu kontinuamente Centro Audivizual Max Stahl, apoiu transformasaun CAMSTL ba Institutu Públiku no atribui naran Max Stahl ba avenida ruma iha Timor-Leste.

“AJTL ho TLPU tane aas nafatin obra valioza ne’ebé mak saudozu Max Stahl husik hela ba Timoroan sira, la’ós de’it ba edifikasaun Estadu direitu demokrátiku ida ne’e, maibé aktu ezemplar husi saudozu hodi sai verdadeiru, defensór ba direitu umanu, liberdade imprensa no liberdade espresaun,” hateten iha komunikadu konjunta entre TLPU-AJTL.

Max Stahl hatudu ona ninia korajen, dedikasaun no domin ba povu no rai Timor-lorosa’e liuhusi kna’ar jornalístika ba kobertura, Masakre Santa Kruz, hodi fó sai ba mundu, aktu kruelidade ne’ebé halakon timoroan barak nia vida no lakon buat hotu. “Nia obra sai ona memória eterna ba timoroan sira”.

“Saida mak Max Stahl defende uaihira nia sei moris, Asosiasaun Jornalista Timor-Lorosa’e – AJTL ho TLPU tane ida ne’e, hodi sai defensór ba liberdade imprensa no liberdade espresaun, hodi guia profesionál komunikasaun sosiál, fotógrafu, kolunista, blogger, eskritór, ativista no seluktan, ne’ebé sai membru ativu iha asosiasaun sira, atu luta ba konstrusaun Estadu ida ne’ebé  mak justa,  fraterna, prosperu no ba dezenvolvimentu ida ne’ebé mak solidária no fraterna, tuir preamblu Konstituisaun RDTL”.

Max Stahl nia ahu kdesan sei haloot iha rate Santa Crus, fatin nia halo gravasaun ba trajedia 12 Novembru 1991.