Diretora Eskola Agape, hanesan mós Fundador, Wennie Fernandez informa, iha tinan ida ne'e sei servisu hamutuk ho Ministeriu Edukasaun Juventude e Desportu (MEJD) liu-liu parte INFORDEPE hodi haré kona ba formasaun Lian jestuais ba manorin na’in sira atu nune’e sira iha koñesementu atu implementa ba Ema ho Defisiensia Tilun iha sira nia eskola.
“Defisiensia tilun presija lian-jestuais hodi bele komprende prosesu aprendijazem iha sira nia eskola tanba ne'e presiza mós profesor sira ne’ebé hatene uituan kona-ba lian-jestuais ida ne’e,” dehan nia husi via telefone ba Jornalista Online INDEPENDENTE (04/02)
Nia hatutan, husi parte INFORDEPE mak sei halo peskizasaun ba eskola sira iha teritoriu laran tomak hodi rekolla dadus ba eskola sira ne’ebé ema ho defisiensia tilun sira eskola ba.
Nune’e Agape ho INFORDEPE sei servisu hamutuk hodi fó formasaun ba eskola Pre-Primaria no eskola Primaria deit, depende ba dadus eskola sira.
“ Parte Agape prontu kolabora ho INFORDEPE hodi implementa programa ida ne’e tanba iha Agape Ema hamutuk 12 ne’ebé akaba ona formasaun kona ba Lian jestuais. Nune’e ami prontu atu hanorin fali profesoers sira iha eskola Pre -Primaria no Primaria iha teritoriu laran tomak," nia dehan.
Nia akresenta, parte INFORDEPE konkorda ona ho Agape nune’e iha tempu besik sei asina MOU (Memorandum of Understanding) atu bele realiza programa ne'e ho susesu bazeia ba filosofia governu nian katak “ labele husik ema ida iha kotuk.”