Tuir Diretora Diresaun Asistensia Publika PDHJ, Elsa do Rosário Viegas da Costa hatete, iha tinan 2021 hahú husi loron 5 fulan-Janeiru to’o loron 27, PDHJ simu ona keixa hamutuk 22.

 Keixa ne’e kompostu husi keixa indisius violasaun ba boa-Governasaun (BG) hamutuk 9 no indisius ba violasaun Diretus Humanus hamutuk 13.

Maski nunee, Diretora ne’e dehan, seidauk bele anunsia ou determina nia tipu kazu, tanba keixa hirak ne’e sei iha prosesu analizasaun husi ekipa jestaun investigasaun.

“Keixa hirak ne’e sei prosesa tuir peizu ne’ebé iha no presiza analiza husi ekipa investigasaun molok PDHJ liu husi ekipa jestaun atu foti desizaun,”dehan nia ba Jornalista Online Independente iha nia knaar fatin, Kaikoli.

Nia hatutan, keixa sira ne’e sei tuir manual rejistrasaun PDHJ nian liu-husi Diresaun Asistensia Publika hafoin kontinua submete ba Diresaun Investigasaun, liu-husi investigador sira no sei halo fali relatorio avaliasaun preliminaria hodi indizita tipu keixa.

Nune’e iha tipu violasaun sira sei kontinua aprezenta ba komite jestaun ne’ebé kompostu husi investigador.

Enkuantu, investigador no ekipa sira ne’e nia Presidente mak Komisariu Provedora, maibé atu deside keixa hodi kontinua prosesa ba oin ne’e kompetensia Komite Jestaun nian.

Bainhira loke kazu refere sei haruka ba iha Diresaun Asistensia Publika hodi prepara karta no haruka ba institusaun respondente sira ho durasaun loron 30 nia laran, hafoin PDHJ iha resposta.

Bainhira iha loron 30 nia laran mak laiha resposta sei aplika prosesu investigasaun. Karik iha loron 30 mak instituisaun responde ona karta ne’e, ofisial keixa sira sei halo relatorio adisional hodi haruka ba Diresaun Investigasaun tantu atu loke ka taka keixa depende ba institusaun respondente sira.

Entretantu, keixa ne’ebé instituisaun responde iha nivel alvo husi Polisia Nasional Timor Lorosa’e (PNTL) iha keisa 16, kompostu husi Dili 13, no Baukau 3.

Keixa 16 ne’e husi total keixa ne’ebé PDHJ simu. Keixa hirak ne’e mós sei iha prosesu analizasaun husi ekipa PDHJ nian.