Maibé buat hotu ne’ebé ita ema la espera bele mosu mai ho milagre ida, ema defisiensia matan ho tilun bele koñese mundu ne’e.

Hanesan esperénsia ne’ebé Diretora Eskola Agape, Wennie Fernandez senti bainhira nia-ain sama rai iha Timor-Leste haree defisiensia tilun abandonadu.

Nia konta tuir katak bainhira foufoun mai husi nia rain Filipina to'o iha Timor-Leste nia sente triste tanba iha rai ne’e laiha eskola ida ne’ebé espesifiku ba Ema ho Defisiensia Tilun.

Tanba ne’e, nia deside harii eskola Ema ho Defisiensia Tilun iha Timor-Leste ho lia-fuan Agape. Agape mai husi lian Grego katak "Domin", ho liafuan ida ne'e mak motiva nia hodi loke eskola ho naran Agape husi tinan 2004 too agora ho susesu.

"Ha’u sente ladun di’ak bainhira Timor-Leste laiha eskola espesifiku kona-ba Ema ho Defisiensia Tilun antaun ne'e susar atu hadia kualidade moris ba Ema ho Defisiensia Tilun ba sira nia futuru,"dehan Wennie iha nia servisu fatin Agape Delta (I) ba Jornalista Independente Online ohin.

Nia splika, objeivu harii eskola Ema ho Defisiensia Tilun ne'e atu ajuda hadia sira nia futuru.

Hahú eskola Agape ne’e estabelese too agora, Ema ho Defisiensia hetan ona servisu hamutuk na’in 18. Na’in 12 servisu iha Agape ne’e rasik, no na’in 6 servisu iha kompañia sira iha Timor-Leste.

 Husi total 18 ne’ebé servisu ona, kompostu feto na’in 6 no mane na’in 12.

Nia sublinha liu tan katak, eskola Agape nia kurukulu hanesan mó ho eskola públiku seluk, maibé diferensia oituan mak uja lingua-jestuais (Bahasa Isyarat) hodi fasilita Ema ho Defisiensia Tilun atu fasil hodi komprende materia sira ne’ebé mestre/a sira honorin ba.

Nia konfesa, lafasil atu hanorin Ema ho Defisiensia Tilun tanba buat hotuhotu tenke uja ho lia-jestuais.

"Ho orgullu tebes tanba maski susar atu aprende lian-jestuais maibé tanba antes ne’e ha’u iha esperiensia lian-jestuais iha Filipina, ha’u bele transforma ba ema na’in 3 (feto) iha Agape no agora dadaun sira sai ona mestra ba lian-jestuais no tradutora hodi fasilita ita nia defisiensia tilun sira iha Agape,"dehan nia.

Agape implementa programa importante tolu ne’ebé integradu hodi haklean labarik sira nia abilidade no pensamento mak hanesan Edukasaun, Negosio no Desportu.

Nia splika, edukasaun haré ba sira nia futuru moris aban-bainrua nian, tanba ne’e Agape fasilita sira hodi aprende materia oin oin hanesan Ema ho La Defisiensia sira.

Programa Negosiu, hanesan fasilita hodi aprende suku ropa, halo pot bunga, homan biti, no buat seluk tan atu nune’e bainhira sira domina formasaun, sira bele halo rasik sira nia produto no faan ba ema seluk.

Programa Desporto, Ema ho Defisiensia Tilun tenke halo exersisio hanesan tebe bola, basket no volyball hodi nune'e sira nia saúde di’ak nafatin hodi aprende buat oin-oin ho di’ak.

Husi esforsu ne’e, Ema ho Defisiensia Tilun na’in 4 , feto na’in 2, mane na’in 2 reprezenta ona Timor-Leste ba partisipa World Deaf Championship Singapore iha 2015 tinan hirak liu ba.

Nia mós ladun hatene dadus sertaja Ema ho Defisiensia Tilun hirak mak iha Timor-Leste tanba Agape la halo pesikizasaun.

Nia relata katak, dadus atual ne’ebé Ema Defisiensia Tilun iha eskola Agape desde Outubro 2019 too agora hamutuk na’in 134, kompostu husi mane na’in 89 no feto na’in 45.

Eskola Agape gratuitu tanba hetan fundus husi Ministério Solidaride Sosial no Inkluzaun (MSSI) no husi Sekretario Estado Desportu nian.

Maski nune'e, Diretora ne’e la esplika total fundus hirak mak Governu apoiu ona.