Reprezentante ADTL, Vitorina Sarmentu Sávio, hatete, dala barak ema susar atu komprende kondisaun ema ho defisiénsia nian iha situasaun oioin, tanba ne’e  ADTL hamutuk ho nia membru sira halo sensibilisaun ba estudante sira iha Universidade Instituitu Ciénsia Saúde.

Aleinde, nia dehan, objetivu husi sensiabilizasaun ne'e atu hodi komemora loron internasionál ba ema ho defisiénsia (EhD) ne'ebé sei akontese iha loron 03 fulan-Dezembru 2023.

“Ami hakarak sensiabiliza kona asuntus inkluzaun defisiensia tanba defisiénsia oras ne'e sai alvo ba iha diskriminasaun iha Timor-Leste,”dehan nia, iha Salaun ICS, Komoro, (20/10).

Reprezentante ne’e husu, ba universitáriu sira atu hatutan ema ho defisiénsia nia lian ba iha munisipiu sira, área rural, kona ba asuntu EhD no oinsa atu halo atendementu ba sira.

Nune’e, Reprezentante ADTL ne’e, espera katak, liu husi sensibilizasaun ne’e, bele hasa'e liu tan estudante sira nia Kuiñesementu iha área defisiénsia no mós oinsá atu atende ema ho defisiénte sira bainhira sira hasoru bareira ruma.

Entretantu, Vise Reitór ICS, Bebiana Auxiliadóra Babo, agradese ba ADTL ne’ebé halo ona sosializasaun ba estudante sira, hodi hasa’e kuiñesimentu sira nian.

Tanba tuir nia, asuntu defisiénsia presiza ema hotu nia atensaun.