ABA fasilita formasaun monitorizasaun orsamentu sensível ba jéneru kargu dirétor husi SEI Featured

By Ivonia Varela Marsu 20, 2024 340
American Bar Association (ABA) realiza formasaun monitorizasaun orsamentu sensivel ba jéneru ba kargu diretor sira husi Sekretariu Estadu Igualdade (SEI). Foto:Media Gabinete SEI. American Bar Association (ABA) realiza formasaun monitorizasaun orsamentu sensivel ba jéneru ba kargu diretor sira husi Sekretariu Estadu Igualdade (SEI). Foto:Media Gabinete SEI.

DILI: American Bar Association (ABA) realiza formasaun monitorizasaun orsamentu sensivel ba jéneru ba kargu diretor sira husi Sekretariu Estadu Igualdade (SEI).

Enkuantu, objetivu husi formasaun refere maka oinsá atu halo monitorizasaun ba iha orsamentu sensível ba jéneru iha Governu Timor-Leste no oinsá mak instituisaun públiku sira iha kompromisu atu konsidera asuntu igualdade jéneru no inkluzaun iha sira-nia planu no orsamentu.

Diretora-Jerál Interina SEI, Maria Filomena Babo Martins informa, formasaun ne’e realiza tanba iha servisu hamutuk entre SEI ho American Bar Association (ABA) bazeia ba akordu ne’ebé asina ona entre SEI ho ABA iha tinan 2023, ne’ebé foku ba iha formasaun ba orsamentu sensível ba jéneru no auditória.

“Formasaun ne’e importante tebes, ha’u hein katak formasaun loron rua ne’e partisipante sira bele aproveita ho didi’ak kona-ba esperiénsia ne’ebé maka sei fahe husi ABA”, dehan Diretora-Jerál Interina, Maria Filomena Babo Martins, liu husi Komunikandu ne’ebé Online INDEPEDENTE Sita.

Diretora afirma, orsamentu sensivel ba jéneru hahú iha tinan 2010, no SEI halo ona esforsu lubuk hodi inklui ona orsamentu sensivel jéneru ba objetivu prinsipál SEI nian iha abordajen integrada Jéneru hodi asegura instituisaun públiku sira hanesan liña ministériu, sekretaria estadu, ajénsia autonóma no munisípiu sira konsidera asuntu igualdade jéneru no inkluzaun iha sira-nia planu no Orsamentu Jerál Estadu (OJE) nian.

Iha fatin hanesan Koordenadór Ekipa Programa ABA iha Timor-Leste, Januário Rangel iha ninia intervensaun haktuir katak, Programa ABA komesa hahú iha tinan rua liubá no hetan suporta husi Departamentu Negósiu Estranjeiru Estadus Unidus nian liuhusi Gabinete Asuntu Global Feto nian iha Ministériu Negósiu Estranjeirus Estadus Unidus ninian no koopera mós ho Embaixada Estadus Unidus Amerika nian iha Timor-Leste.

Nia dehan, programa ne’e rasik ninia objetivu dahuluk liu maka hakarak suporta feto sira atu asesu ba propriedade rai no liuliu Lei Rai nian ne’ebé maka promulga ona iha tinan 2017.

Programa ne’e mós hakarak haree kona-ba enkuadramentu legal sira ne’ebé maka iha jerasaun foun mai no sosiedade rezisténsia sira ne’ebé maka mosu iha ita-nia Lei ne’ebé maka promulga ona iha tinan 2017.

Programa seluk ne'ebé ABA halo ona iha TL maka servisu hamutuk ho Ministériu Interior no Sekretaria Estadu Terras no Propriedade liuhusi Ministériu Justisa nia okos atu haree liubá mediasaun nian, servisu mós ho GMPTL hodi haree mós kona-ba asuntu rai nian ne’ebé mak ABA konvida ona Membru Parlamentu Nasionál sira hodi ba hato’o iha komunidade sira iha área rurál kona-ba asuntu rai nian.

“Objetivu ikusliu maka bazeia ba akordu ida ne’ebé maka asina ona entre SEI ho ABA iha tinan 2023 kona-ba Orsamentu Sensivel ba Jéneru no ohin realiza formasaun Monitorizasaun Orsamentu Sensivel ba Jéneru iha Governu Timor-Leste ne’ebé marka mós prezensa hosi GMPTL, Ministériu Interior no Sekretaria Estadu ba Rai no Propriedade,” dehan Fasilitadór.

Entretantu, fasilitadór ba formasaun refere fornese husi American Bar Association (ABA) nia perítus internasionál ba asuntu refere ne’ebé mai husi Estadus Unidus Amérika no partisipante ba formasaun refere mai husi kargu diretores sira husi SEI mak hanesan Inspetora no Auditoria-SEI, Benigna Maria Amaral, Xefe-Gabinete SEI, Francisca S. de Sousa, Diretora DNGPE-SEI, Maria Eusébia Soares Delima, Kargu Xefia no Funsiunáriu/a Téknika husi SEI, reprezentante husi GMPTL, Terras Propriedade no Ministériu Interior.

Rate this item
(0 votes)

Independente Digital TV