“Ohin kazu foun laiha no kazu rekuperadu iha na’in ida,”dehan Adjunta Kordenador Forsa Tarefas ba Prevensaun no Mitigasaun Surtu Covid-19 iha Timor-Leste, Dra. Odete da Silva Viegas, iha komunikadu ne’ebé Online INDEPENDENTE asesu, domingo ne’e.
Ho nune’e, kazu ativu ne’ebé baixa hela iha sala izolamentu hamutuk na’in tolu (3).
Nune’e, komulativu kazu konfirmadu sura husi loron 21 fulan-Marsu tinan 2020 to’o 28 Novembru 2021 hamutuk 19.822 no komulativu kazu óbitu iha Timor-Leste hamutuk na’in 122.
Entretantu, husi horseik (27/11) mai ohin teste PCR ne’ebé Laboratóriu Nasional Saúde halo iha Dili hamutuk na’in 27, kompostu husi, random screening na’in rua, viájen internasional na’in 27 no follow up iha kuarentena na’in ualu.
Aleinde, teste PCR ne’ebé halo horseik, iha Munisipiu sira seluk, RAEOA no HNGV hamutuk na’in 67, kompostu husi, Baukau na’in ida, Maliana na’in tolu, Maubisse na’in tolu, RAEOA na’in 10, Suai na’in haat no HNGV na’in 46.
Enkuantu, kobertura vasina kompletu ka doze daruak iha teritoriu Timor-Leste atinji ona pursentu 58,4 (58,4%).
