Iha kondekorasaun ne'e Prezidente Repúblika entrega Medalia no Ordem Timor-Leste ba feto nain 9, iha ambitu selebrasaun loron proklamasaun independensia 28 Novembru ba dala-46 iha Aldeia Darsula, Suku Gariwai, Postu Adminitrativu Baukau Vila, Munisipiu Baukau.
Total sidadaun ne'ebé simu kondekorasaun husi Prezidente Repúblika ho Ordem Timor-Leste ne'e hamutuk na'in 52.
Enkuantu, sidadaun na’in-5 simu kondekorasaun ho ‘Kolar Orden Timor-Leste’ ho tiítulu póstume, na’in-1 hetan kondekorasaun ‘Kolar Orden Timor-Leste’, na’in-8 simu kondekorasaun ‘Medalla Orden Timor-Leste’ títulu póstume,
Nune'e sidadaun na’in-39 hetan kondekorasaun ‘Medalla Orden Timor-Leste, husi numeru ne'e sidadaun feto na'in 9 mós hetan Kondekorasaun husi Prezidente Repúblika ho Ordem Timor-Leste ho Grau Medalia.
Feto nain 9 ne'e hanesan, Paulina Ribeirro "Buibrani" kargu hanesan Membru OPMT, Grau Medalia. Julia Souza Hendriques Boavida Soares " Bi Rozas", kargu ka Postu Asistente Politiku, Grau Medalia, no Crazinda Rosa Almeida", Bi Roza" kargu Membru OPMT, Grau Medalia, Eulalia Xavier" Bi Eu" kargu Membru OPMT, Grau Medalia, Maria Joana da Costa " Bi Cara" kargu Membru OPMT, Benvinda Gusmão Filipe "Bi Kiak", Ermelinda Vitor, Anjelina Vila Nova Cabral, no Arminda Fonsia Ribeirro", Muliana" kargu Postu Membru OPMT ho Grau Medalia.
Prezidente Repúblika, Fransisco Guterres Lú-Olo hatete, husi esforsu tomak hotu nian mak ita hetan vitoria boot ida ne'e moris ho liberdade tomak iha ita-nia rai no timoroan, ho ita-nia hanoin no hakarak ukun rasik aan.
"Nunee mak ha’u, ho onra no orgullu, kondekora ohin ho naran Estadu nian, ita-nia as’wain na’in tolu nulu resin sia (39), ne’ebé mate iha funu laran, ka hafoin ita restaura ita-nia independénsia, ho Ordem Timor-Leste,"dehan nia liu husi diskursu, iha Aldeia Darsula, domingu horseik (28/11).
Iha 25 novembru, liu-husi Dekretu Prezidente Repúblika númeru 102 /2021, iha ámbitu selebrasaun Proklamasaun Independénsia kondekora sidadaun nasionál na’in-52
Prezidente Repúblika fo kondekora ba sidadaun kombatente sira ne'ebe uluk halo funu iha frente armada ho durasaun entre 20 to'o 23 anos no sira ne'ebe uluk mate iha funu laran.
Tuir Dekretu-Lei númeru 20/2009, Ordem Timor Leste nu’udar rekoñesimentu husi estadu ba ema estranjeiru ka sidadaun nasionál, ne’ebé liuhusi sira-nia atividade profisionál, sosiál ka asaun espontánea nakonu ho korajen, fó kontribuisaun boot ba Timor-Leste, ba Timoroan ka ba umanidade.
Iha Dekretu Prezidente Repúblika fó-sai katak ita hotu-hotu iha devér atu rekoñese no valorize asaun patriotizmu, dedikasaun no sakrifísiu boot hirak ne’ebé mak sidadaun sira ne’e hatudu ona durante temu luta ba ukun-an.
Sira sakrifika sira-nia tempu juventude no husik oportunidade atu bá tuir edukasaun formal iha eskola tanba hakarak liberta sira-nia rain doben Timor-Leste.
"Ohin Estadu no Nasaun tomak fó rekoñesimentu no valorizasaun, liuhusi kondekorasaun Orden Timor-Leste, ba knar importante hirak ne’ebé mak sidadaun nasionál sira ne’e hatudu tiha ona", tenik nia.
Asistente Editor: Saturnina da Costa
