Xefe Suku Fahilebo Marcelino da Cruz hatete, aldeia tolu ne'ebé seidauk asesu ba liña eletrisidade mak, Aldeia Tuhilo leten, Tuhilo kraik no Fatuneso.
“Ita nia komunidade iha aldeia tolu, durante ne'e seidauk asesu ba liña eletrisidade no sira uza de'it lilin, lampu, lenti,”dehan nia ba Online INDEPENDENTE, iha Komemorasaun Loron Independensia ba dala-46, iha Likisa, domingo ne’e (28/11).
Nia haktuir, komunidade sira ne’ebé laiha kbiit atu sosa lilin no mina rai tau ba lampu, sira buka deit kami tuku hafoin sira uza ba kalan no ba sira ne’ebé ekonomia masimu mak uza jelador.
Enkuantu, iha tinan kotuk Xefe Suku Fahilebo hasoru ona Ministru Óbras P’ubliku hodi hato’o prekupasaun ne’ebé komunidade sira hasoru, maibé to’o agora seidauk iha rezultadu.
Tanba ne’e, nia rekomenda ba Governu no Estadu atu tau matan ba komunidade sira iha suku refere.
“Ha'u nudar Líder Komunitaria rekomenda ba estadu no governu tenke tau matan mai ami iha suku refere, ha’u nia populasaun no estudante sira hakarak tebes atu asesu ba liña eletrisidade,”tenik nia.
Entretantu, total populasaun iha Suku Fahilebo hamutuk rihun 1.664, kompostu husi Aldeia Fatuneso iha uma kain 578, Aldeia Tuhilo Kraik iha uma kain 564 no Aldeia Tuhilo Leten iha uma kain 522.
Asistente Editor: Saturnina da Costa
