“Ohin kazu detetadu foun iha na’in 25 no rekuperadu iha 132,”dehan nia iha komunikadu neebé Online INDEPENDENTE asesu, segunda nee (28/02).
Ho nunee, kazu ativu neebé dadauk nee baixa hela iha sala izolamentu hamutuk na’in 425.
Nunee, total komulativu kazu konfirmadu neebé sura husi loron 21 marsu 2020 to’o 28 feveriru 2022 hamutuk 22.693 no komulativu óbitu iha na’in 128.
Enkuantu, iha oras 24 nia laran, teste PCR neebé Laboratoriu Nasional Saúde halo iha Dili hamutuk 461, neebé kompostu husi, vijilansia sentinela iha na’in haat (4), rastreiu ba kontaktu na’in neen (6), rastreiu aleatoriu na’in 88, viájen internasional na’in 362 no follow up iha kuarentena iha na’in ida (1).
Aleinde, teste PCR neebé halo iha munisipiu sira seluk, inklui Rejiaun Administrativu Espesial Oekuse Ambeno (RAEOA) no Óspital Nasional Guido Valadares (HNGV) hamutuk na’in 67.
Entretantu, iha 28 fevereiru 2022, izolamentu Lahane, Vera Crus, HNGV no fatin seluk hala’o tratamentu óspitalizadu ba kazu pozitivu hamutuk na’in hitu (7), neebé kompostu husi, pasiente baixa ho Covid-19 iha na’in lima (5), no baixa tanba Covid-19 iha na’in ida moderadu no mós grave na’in ida.
Tanba nee, Ministeriu Saúde apela ba populasaun sira hotu, atu aprezenta an iha fasilidade saúde (sentru saude ka óspital) neebé besik, bainhira sente isin manas, kakorok moras, inus been, ka mear, hodi bele hetan atendementu husi profisional saúde sira.
Nunee mós, Ministeriu Saúde husu ba populasaun sira iha Timor-Leste laran tomak, maske simu ona vasina doze kompletu, maibé nafatin respeita regra prevensaun no ijiene individual, neebé governu hatur ona, atu prevene moras Covid-19 la hadaet ba mai.
