27 Fevereiru, Kazu Foun Na’in 19 no Rekuperadu iha 66 Featured

By Gregorio da Costa Fevereiru 27, 2022 262
Pozitivu Covid-19. Foto:Dok. Pozitivu Covid-19. Foto:Dok.

DILI: Koordenadora Jeral Surtu Covid-19 iha Ministeriu Saúde, Dra. Odete da Silva Viegas, informa, kazu pozitivu foun Covid-19 iha na’in 19 no kazu rekuperadu iha na’in 66.

“Ohin (27/02) kazu detetadu foun iha na’in 19, kazu rekuperadu na’in 66 no kazu ativu iha 532,”dehan nia iha komunikadu neebé Online INDEPENDENTE asesu, domingo nee.

Ho nunee, total komulativu kazu konfirmadu sura husi loron 21 marsu 2020 to’o 27 fevereiru 2022 hamutuk 22.668.

Enkuantu, Ministeriu Saúde mós haktuir, munisípiu rua (2) laiha ona kazu ativu, enkuantu, munisípiu 9 ho RAEOA sei iha kazu esporádiku no Kapitál Díli ho Transmisaun Komunitária.

Aleinde, kobertura vasina kompletu (doze 2) iha Timor-Leste tomak, foin atinji 71,8%.

Entretantu, iha oras 24 nia laran, teste PCR neebé Laboratoriu Nasional Saúde halo iha Dili hamutuk 97, rastreiu ba aleiatoriu na’in 18 no viajen internasional hamutuk na’in 79. Total teste PCR neebé halo iha munisipiu sira seluk, inklui RAEOA no HNGV hamutuk 88.

Haree ba kazu neebé kada loron rejista, Ministeriu Saúde apela ba populasaun sira hotu, atu aprezenta an iha fasilidade saúde (sentru saude ka óspital) neebé besik, bainhira sente isin manas, kakorok moras, inus been, ka mear, hodi bele hetan atendementu husi profisional saúde sira.

Nunee mós, Ministeriu Saúde husu ba populasaun sira iha Timor-Leste laran tomak, maske simu ona vasina doze kompletu, maibé nafatin respeita regra prevensaun no ijiene individual, neebé governu hatur ona, atu prevene moras Covid-19 la hadaet ba mai.

Rate this item
(0 votes)

Independente Digital TV