Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, numeru kazu detetadu foun reduz kompara ho loron horseik (26/09) iha kazu 32.

Husi kazu detetadu 16 ne’e, iha Kapital Dili na’in neen (6), Baukau na’in hitu (7) no RAEOA na’in tolu (3).

“Husi kazu detetadu ne’e, iha kazu sia (9) ka 56,2% mak hatudu sintomas no kazu 5 ka 31% simu ona vasina  doze dahuluk,”dehan nia iha komunikadu ne’ebé Online INDEPENDENTE asesu, segunda ne’e.

Aleinde, SIJK mós rejista pasiente ne’ebé rekupera husi moras Covid-19 iha na’in 90 no kazu ativu ne’ebé baixa hela iha Izolamentu hamutuk na’in 920.

Nune’e, total komulativu kazu konfirmadu sura husi loron 21 fulan-Marsu tinan 2020 to’o loron 27 fulan-Setembru tinan 2021 hamutuk na’in 19.398.

Entretantu, husi horseik (26/09) mai ohin teste PCR ne’ebé Laboratóriu Nasional Saúde halo iha Dili hamutuk na’in 100, kompostu husi Vijilansia sentinela na’in tolu (3), Contact tracing na’in 4, Random screening na’in ualu (8), Viajen sai husi serka sanitaria Dili na’in 21, Viajen internasional na’in neen (6) no follow up iha kuarentena hamutuk na’in 58.

Enkuantu, teste PCR ne’ebé halo iha munisipiu sira seluk, RAEOA no HNGV hamutuk na’in 175. Kazu detetadu ne’ebé hala’o tratamentu iha Izolamentu Vera Crus, Lahane no HNGV hamutuk na’in 53, kompostu husi kazu grave na’in lima (5), kazu moderadu na’in 32  no kazu leve na’in 16.