Konsellu Ministrus sei analiza fila-fali opsaun sira nee no sei delibera fali iha sorumutu KM nian tuir mai, hodi haree didiak kestaun hirak-nee.
“Atu asegura vitima-sira neebé daudaun sei iha lona okos, nee mak Governu deside inklui planu imediatu atu halo kontrusaun ba sira nia hela fatin hodi bele re-aloka,” Ministru Prezidénsia Konsellu Ministru (MPKM), Fidelis Manuel Leite Magalhães, hateten lia hirak-nee, hafoin reuniaun KM iha Palásiu Governu, Sesta (24/09).
Husi ema nain 15.876 neebé uluk hela ona iha sentru akollamentu 57 neebé eziste ona iha sidade Dili, ema rihun 15 liu mak fila ona ba sira nia hela fatin ka família sira. Daudaun nee iha ema nain 765 husi 137 família maka sei hela iha sentru hitu ativu nee.
Sekretáriu Estadu Protesaun Sivíl, Joaquim Gusmão hateten, Primeiru Ministru bolu SEPS ho MAE mai halo diskusaun, nunee bele buka solusaun ba vitima sira neebé sei iha tenda okos.
Agora daudaun sei iha sentru evakuasaun neen mak sei ativu hela iha Dom-Bosco, Manleuana iha Rate Ain, iha Kampu Manleuana nian, Hera no mós iha Restaurante Metiaut nian uma kain 131 no mós familia iha neeba ema hamutuk 701.
