Tuir desizaun KM, konfinamentu domisiliariu ne’e sei la’o durante loron hitu, hahú iha oras 00:00 loron 27 fulan-Agostus to’o oras 23:59 loron 2 fulan-Setembru tinan 2021.
“Bandu ema hotu, inklui ema sira ne’ebé vasina ona dala rua (2), atu labele sai husi Munisipiu Dili, nune’e, tenke hela iha sira-nia uma ka iha alojamentu temporáriu, inklui sentru akollamentu, exetu iha situasaun ne’ebé prevee iha diploma ne’e, liuliu tanba razaun saúde, serbisu, asesu ba sasán no servisu nesesidade bázika nian no simu vasina kontra Covid-19,” dehan Ministru Prezidensia Konsellu Ministru Fidelis Leite Magalhães, iha Palasiu Governu, kinta ohin (26/08).
Nia hatutan, bandu mós transporte públiku, táxi, mikrolete, biskota no anguna atu halo sirkulasaun iha area Munisipiu Dili nia.
Aleinde, suspende selebrasaun relijioza koletiva no bandu mós atu hala’o serimónia fúnebre ne’ebé envolve partisipasaun ema na’in sanulu liu, no sira ne’ebé durante iha serimónia ne’e rasik tenke uza máskara oin nian hodi taka inus no ibun no mantein distánsia, pelumenus metru ida ho ema seluk ne’ebé prezente iha serimónia ne’e.
Enkuantu, estabelesimentu komersiál, industriál, artezanál ka prestasaun servisu nian taka ba públiku, ho exesaun ba estabelesimentu sira ne’ebé autoriza iha Rezolusaun Governu ne’e, liuliu estabelesimentu ne’ebé fa’an ai-han no sasán nesesidade bázika nian, eletrisidade, telekomunikasaun, prestasaun kuidadu médiku, farmásia, postu kombustivel nian, no instituisaun finanseira sira.
Ba restaurante sira bele fornese hahán iha rejime take away ka entrega iha uma de’it no estabelesimentu sira-seluk ne’ebé taka ba públiku bele dezenvolve nia atividade liu husi servisu entrega ba uma de’it.
Nune’e, vendedór ambulante ba sasán alimentár no sasán ba nesesidade bázika bele mantein sira-nia atividade, inklui merkadu sira iha Munisípiu Dili nian hanesan, Manleuana no Taibessi mantein nia funsionamentu, hahú husi oras tuku 6 dadeer to’o tuku 6 loro-kraik.
Asistente Editor: Saturnina da Costa
