Ho nunee, kazu ativu neebé dadauk nee baixa hela iha sala izolamentu hamutuk na’in 839.

"Numeru kazu detetadu foun ohin iha na’in 56,  ho taxa pozitividade iha 4,2 no kazu rekuperadu iha na’in 118," dehan nia iha komunikadu neebé Online INDEPENDENTE asesu, kinta nee (24/02).

Nunee, total komulativu kazu konfirmadu neebé sura husi loron 21 marsu 2020 to’o 24 fevereiru 2022 hamutuk 22.584 no ábito iha na’in 126.

Entretantu, iha oras 24 nia laran teste PCR neebé Laboratoriu Nasional Saúde halo iha Dili hamutuk na’in 285, neebé kompostu husi, rastreiu ba kontaktu na’in 106, rastreiu ba aleiatoriu na’in 130 no viajen internasional na’in 48 no follow up iha kuarentena na’in ida.

Aleinde, teste PCR neebé halo iha munisipiu sira seluk, inklui Rejiaun Administrativu Espesial Oekuse Ambeno (RAEOA) no Óspital Nasional Guido Valadares (HNGV), hamutuk na’in 150.

Haree ba kazu neebé kada loron rejista, Ministeriu Saúde apela ba populasaun iha Díli laran no mós iha Munisípiu sira seluk, atu aprezenta-an iha fasilidade saúde (Sentru Saúde ka Ospitál) neebé besik, bainhira sente isin-manas, kakorok moras, inus-ben, ka mear, hodi bele hetan atendimentu husi profisionál saúde sira.

Nunee mós, Ministeriu Saúde husu ba populasaun sira iha Timor-Leste laran tomak, maski simu ona vasina kompletu, maibé nafatin respeita regra prevensaun no ijiéne individual, ne’ebé Governu hatuur ona, atu prevene moras Covid-19 da’et ba mai.