Nia haktuir, liga ho kestaun ne’e, sujestaun ida maka atu hare ba asuntu ne’e, Komisaun Kontra Taballu Infantil tenke servisu hamutuk. Progresu balun ne’ebé halo ona hein katak iha tempu badak Konselu Ministru bele aprova dekretu lei kona-ba bandu labarik involve iha traballu infantil no planu asaun nasionál ba fonte traballu infantil.
Tuir nia, se ida ne’e iha ona Prezidente Autoridade Munisípiu, INDDICA no instituisaun hotu ne’ebé servisu ba iha asuntu labarik nian bele halo nia servisu ho di’ak liu tan, maibé agora ne’e atu ba hapara de’it ne’e la fasil.
“Husu labele promete dehan 2022 komesa bandu labarik labele fa’an, maibé ita presiza kria kondisaun ba sira no ida ne’e la fasil. Ita labele tuur-tuur ba hapara de’it sira labele halo servisu ida ne’e,” informa Dinorah hafoin halo konferensia imprensa iha salaun Ministériu Solidariedade Sosial no Inkluzasaun, Kaikoli, (24/02).
Nia dehan, labarik sira halo servisu, tanba sira mai husi situasaun ida ne’ebé mak instituisaun hotu presiza hatene didi’ak, hapara sira nia servisu saida mak bele kontribui ba familia ne’e atu bele kompleta sira nia nesesidade familia nian. ida ne’e situasaun ida ne’ebé kompleks tebes.
Antes ne’e, Prezidente Autoriedade Munisipiu Dili, Guilermina Filomena Saldanha, promete ona tinan oin 2022 sei bandu labarik ho idade 17 ba karaik sei la halo atividade negosiu iha kapital.
Nia dehan, labarik ho idade tinan 17 ba karik inan ho aman tenke iha resposabilidade halo servisu hodi suporta oan ba eskola, tanba ne’e laiha razaun seluk sira atu halo servisu, liu liu faan sasan.
“Hakarak ka lakohi tinan oin 2022 mai, hau hakarak labarik sira ne’ebé ho idade minoriedade label tan faan sasan iha dalan ninin, tanba labarik sira ne’e nia fatin iha eskola no uma tanba labarik ho idade 17 ba kraik inan ho aman mak tenke hola responsabilidade,” dehan Guilermina ba joranalista sira, iha momentu halo abertura ba formasaun kontrola emosaun iha Komandu PNTL, Kaikoli.
Nune’e mós, Diretora Ezekutiva JSMP, Ana Paula Marçal hateten, iha ezbosu projetu-lei ne’ebé Komisaun F PN introdús ne’e iha matéria foun no mudansa balun ne’ebé JSMP propoin mak hanesan títulu alternativa, definisaun ba labarik, adolexente, joven, matéria ne’ebé sei falta no proposta alternativa.
“Atu bele reflete ho di’ak norma sira ne’ebé konsagra iha Konstituisaun RDTL no Konvensaun Internasionál Direitu Labarik, inklui konteúdu husi lei ne’e rasik bele avansa ho títulu ida hanesan “Rejime Jurídiku kona-ba Direitu, Liberdade no Protesaun Labarik no Adolexente,” dehan nia, iha edifísiu JSMP, Kolmera, tina kotuk.
Nia dehan, bainhira temi de'it protesaun, interpretasaun ne’e halai liu aspetu negativu ka halai liu ba aspetu labarik sira ne’ebé tama ona iha kategoria risku laran, ne’ebé presiza hetan protesaun.
“Intensaun husi lei ida ne’e la’ós de'it haree ba aspetu ida de’it, maibé aspetu hotu-hotu ne’ebé relasiona ho direitu, liberdade no garantia fundamentál sira labarik sira nian, inklui direitu ba protesaun ba labarik sira iha risku ba violasaun sira-nia direitu, liberdade no garantia fundamentál sira,” dehan nia.
