Tuir Komunikadu ne’ebé Online INDEPENDENTE asesu katak, Projetu Rezolusaun Governu ne’e aprezenta husi Ministru Interiór Francisco da Costa Guterres, katak iha tinan 2025, governu sei rekruta membru foun hamutuk 500, ne’ebé 400 sei tama iha Kursu Formasaun Ajente no 100 iha Kursu Formasaun Ofisiál.

“Medida ida-ne’e ho objetivu atu reforsa pesoál PNTL, hodi garante kapasidade operasionál ne’ebé boot-liu no prezensa polísia ne’ebé efisiente liu iha teritóriu nasionál tomak,” dehan komunikadu ne’ebé Online INDEPENDENTE asesu iha Pajina Ofisial PCM, Kuarta (05/02/25).

Komunikadu ne’e haktuir, rekrutamentu ba ajente no ofisiál foun sira sei posivel atu rezolve defisit atuál iha rekursus umanus, hadi'a nível patrullamentu no vijilánsia nian, atu nune’e kontribui ba reforsu seguransa públika nian.

Nia objetivu mós atu promove renovasaun jerasionál hosi instituisaun, hodi asegura kontinuidade no modernizasaun estrutura polísia nian.

Rekrutamentu ida-ne’e mós ho objetivu atu reforsa reprezentasaun PNTL nian, atu nune’e bele garante forsa polísia ida ne’ebé reprezenta liután iha diversidade nasionál, ne’ebé fundamentál atu estabelese relasaun konfiansa no proximidade ho komunidade oioin.

Entretantu, membru foun hamutuk na’in-500 na’in 400 sei tama iha Kursu Formasaun Ajente no na’in 100 iha Kursu Formasaun Ofisiál.