Ministru Prezidensial Konsellu Ministru, Agio Pereira hatete, selebrasaun loron Konsulta Populár atu refleta fali loron ne’ebé Timor-oan sira vota ba independénsia no vota ba moris di’ak.

“Selebrasaun XXV ba Konsulta Popular nian, atu reflete mos iha tempu ne’ebé tinan 25 ita nia nasaun vota, vota la’os de’it ba indepedensia maibé ba mos moris diak, ba joventu de sira nia futuru, no iha tinan 25 ita atu reflete ne’e saida mak ita halo di’ak liu” dehan PCM iha Salaun Yan Martin Balide, Tersa (27/08).

Nia hatutan, iha tinan 25 ne’e, nasaun Timor-Leste tau liu prioridade ba estabilidade nasional, páz no rekonsiliasaun, maibe iha tinan ida ne’e bá oin sei tau prioridade liu ba iha setór edukasaun.

“Agora ne’e edukasaun priridade boot ida, uluk tinan rua nolu resin ita nia nasaun ne’e prioridade mak estabilidade nasional paz, domin no damen, rekonsiliasaun hodi rai ne’e nia kondisaun la’o lais liu tan, ne’ebé ha’u hanoin uluk ne’e ita tuir ejizensia uluk nia agora ita tuir foun ohin loron nian hodi ba dook,” dehan Ministru.

Ministra Edukasaun, Dulce De Jesus Soares hatete, profesor no estudante maka sai futuru nasaun nian, tanba profesor nia papel maka atu hanorin estudante sira sai di’ak no estudante mós iha papél atu aprende di’ak.

Tanba ne’e, la’os de’it husi profesór sira maibé husu mos ba komunidade edukativa liliu ba inan aman sira nia responsabilidade atu ajuda oan sira iha prosesu aprendijazem.

“Papel profesor no no estudante nia importante ba dezenvolvimentu nasaun ne’e nian, estudante mak jerasaun futuru nasaun ne’e nian, profesor nia papel atu hanorin diak no estudante nia papel atu aprende ho diak, parte rua ne’e importante tebes, mabé la’os profesor ho lunu deit maibé ba komunidade edukativa liliu inan-aman sira atu ajuda oan sira iha prosesu aprendijazem,” katak Ministra.

Nia dehan,  nasaun Timor-Leste, jerasaun foun maka tenki lori ba oin, no jerasaun maka estudante rihun atus tolu resin (300 mill) ne’ebé mak agora dadauk iha Ministeriu Edukasaun.