Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu positivu foun iha Dili kontinua rejistu as kompara ho Munisipiu sira seluk.

Husi kazu 70 ne’e, na’in 35 iha Kapital Dili, na’in 5 iha Baukau, na’in 4 iha Bobonaro, na’in 2 iha Kovalima, na’in 2 seluk iha Likisa no na’in 18 iha RAEOA.

“Husi kazu detetadu foun ne’e, na’in 34 ka 48,5% mak hetan sintomas, na’in 22 ka 31% simu ona vasina doze kompletu no na’in 8 ka 11% simu ona vasina doze dahuluk,”dehan nia komunikadu ne’ebé Online INDEPENDENTE asesu, kinta ne’e.

Aleinde, SIJK rejistu mós ema ne’ebé rekupera husi moras Covid-19 hamutuk na’in 175 no kazu ativu ne’ebé baixa hela iha Izolamentu hamutuk na’in 1.995.

Nune’e, total komulativu kazu konfirmadu hamutuk na’in 18.856.

Ba kazu mate, Rui relata, matebian na’in ida hanesan sidadaun Timor-Oan no na’in ida seluk ema estranjeiru.

Kazu dahuluk, mane ho idade 50 hela iha Baukau, seidauk vasina, diagnóstikadu ho Sindroma Insufisiénsia Respiratória Aguda (SIRA) tanba Covid-19 iha loron 15 fulan-Setembru tinan 2021. Pasiente ne’e iha mós moras lepra. Nune’e iha loron 16 fulan-Setembru halo transferensia mai Izolamentu Vera Crus iha dalan pasiente hakotu-iss iha tuku 12.15.

Kazu daruak, mane ho idade  64, simu ona vasina doze kompletu, diagnóstikadu ho SIRA iha HNGV iha loron 11 fulan-Setembru tinan 2021, iha loron ne’e kedas hala’o tratamentu iha Izolamentu Lahane. Nune’e, pasiente hakotu-iis ohin dader tuku 11.50.