Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo informa, Munisipiu Dili kontinua rejista númeru kazu boot liu kompara ho Munisipiu sira seluk.
Husi total kazu detetadu 133, iha Dili deteta kazu 70, Bobonaro kazu 6, Baukau kazu 10, Ainaro kazu 1, RAEOA kazu 22, Manatuto kazu 1, Kovalima kazu 1, Likisa kazu 3, Lautem kazu 18 no Vikeke kazu 1.
“Husi kazu detetadu ne’e, na’in 75 ka 56,5% hatudu sintomas, na’in 35 ka 26% simu ona vasina kompletu no na’in 11 ka 8% simu ona vasina doze dahuluk,”dehan nia iha komunikadu ne’ebé Online INDEPENDENTE asesu domingo ne’e.
Maske deteta kazu pozitivu, maibé SIJK mós rejista kazu rekuperadu ne’ebé barak liu kazu pozitivu foun. Iha loron 12 fulan-Setembru ema na’in 168 mak rekupera no kazu ativu hamutuk 3.105.
Total komulativu kazu sura husi loron 21 fulan-Marsu tinan 2020 to’o loron 12 fulan-Setembru tinan 2021 hamutuk 18.515.
Ba kazu mate, Rui informa, matebian na’in lima ne’e hanesam sidadaun Timor-Oan no seidauk simu vasina.
Kazu dahuluk, mane ho idade tinan 14, hanesan Timor-Oan hela iha Lospalos, seidauk simu vasina, diagnostikadu Sindroma Insufisiensia Respiratoria Aguda (SIRA) tanba Covid-19 iha 10 Setembru. Iha loron ne’e kedas hala’o tratamentu iha izolamentu Vera Crus. Nune’e, iha sabado (11/09) kalan tuku 22.10 pasiente hakotu-iis.
“Familia kolabora ho ekipa saúde atu hala’o funeral tuir protokolu ne’ebé adota iha Timor-Leste,” dehan Rui.
Kazu daruak, mane ho idade 63 seidauk vasina, hela iha Lospalos, diagnostikadu ho SIRA tanba Covid-19 iha 5 Setembru. Loron ne’e kedas pasiente hala’o tratamentu iha Izolamentu Lahane. Nune’e, pasiente hakotu-iis iha sabado (11/09) kalan kalan tuku 20.58.
Familia kolabora ho ekipa saúde atu hala’o funeral tuir protokolu ne’ebé adota iha Timor-Leste.
Kazu datoluk, feto ho idade 56 hela iha Suai, seidauk vasina, diagnóstikadu ho SIRA tanba Covid-19 iha Ospital Referénsia Suai iha loron 11 fulan-Setembru tinan 2021, enkuantu iha loron ne’e kedas hala’o tratamentu iha Ospital refere, tuir protokolu tratamentu ba Covid-19 nian. Nune’e pasiente hakotu-iis iha sabado (11/09) kalan tuku 19.20.
Familia kolabora ho ekipa saúde atu hala’o funeral tuir protokolu ne’ebé adota iha Timor-Leste.
Kazu dahaat, mane ho idade 97 hela iha Munisipiu Baukau, seidauk simu vasina. Iha loron 11 fulan-Setembru tinan 2021 diagnóstikadu SIRA tanba Covid-19, pasiente rerefe iha mós moras hipertensaun no hala’o tratamentu iha Izolamentu Baukau tuir protokolu tratamentu ba Covid-19. Nune’e, pasiente hakotu-iis iha sabado (11/09) kalan tuku 21.12.
Familia kolabora ho ekipa saúde atu hala’o funeral tuir protokolu ne’ebé adota iha Timor-Leste.
Kazu dalima, mane ho idade 41 hela iha Maliana, seidauk simu vasina. Iha loron 9 fulan-Setembru tinan 2021, diagnóstikadu ho SIRA tanba Covid-19. Iha loron ne’e kedas hala’o tratamentu iha Izolamentu Vera Crus, pasiente hakotu-iis ohin (12/09) iha tuku 14.10.
Familia kolabora ho ekipa saúde atu hala’o funeral tuir protokolu ne’ebé adota iha Timor-Leste.
Tuir dadus husi SIJK, total ema ne’ebé mate ho Covid-19 hamutuk na’in 95.
Entretantu, husi horseik (11/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 286 kompostu husi Vijilansia sentinela na’in 7, Contact tracing na’in 44, Random screening na’in 72, Viajen sai husi serka sanitaria Dili na’in 77, Viajen internasional na’in 5 no Follow up iha kuarentena na’in 81.
Teste PCR ne’ebé halo iha Munisipiu sira seluk, RAEOA no HNGV hamutuk na’in 281. Ohin, iha Izolamentu Vera Crus, Lahane, HNGV no fatin seluk iha teritoriu laran tomak halo tratamentu hospitalizadu ba kazu detetadu hamutuk na’in 91 kompostu husi kazu grave na’in 10, moderadu na’in 55 no kazu leve na’in 26.
