Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo informa, Munisipiu Dili kontinua rejista númeru kazu boot liu kompara ho Munisipiu sira seluk.

Husi total kazu detetadu 74, iha Dili deteta kazu 61, Baukau kazu 5, Ainaro kazu 2, Manatuto kazu 3,  no Vikeke kazu 3.

“Husi kazu detetadu ne’e, na’in 51 ka 69% hatudu sintomas, na’in 9 ka 12% simu ona vasina kompletu no na’in 5 ka 15% simu ona vasina doze dahuluk,”dehan nia iha komunikadu ne’ebé Online INDEPENDENTE asesu sabado ne’e.

Maske deteta kazu pozitivu, maibé SIJK mós rejista kazu rekuperadu ne’ebé barak liu kazu pozitivu foun. Iha loron 11 fulan-Setembru ema na’in 222 mak rekupera no kazu ativu hamutuk 3.145.

Total komulativu kazu sura husi loron 21 fulan-Marsu tinan 2020 to’o loron 11 fulan-Setembru tinan 2021 hamutuk 18.382.

Ba kazu mate, Rui informa, na’in ida simu ona vasina doze dahuluk  no na’in ida seluk seidauk simu vasina.

Kazu dahuluk, mane ho idade tinan 57, ema estanjeiru hela iha Dili, simu ona vasina doze dahuluk, diagnostikadu Sindroma Insufisiensia Respiratoria Aguda (SIRA) tanba Covid019 iha Hospital Nasionál Guido Valadares iha 9 Setembru. Iha loron ne’e kedas hala’o tratamentu iha izolamentu Lahane, no ohin dader tuku 7.45 pasiente hakotu-iis.

“Familia kolabora ho ekipa saúde atu hala’o funeral tuir protokolu ne’ebé adota iha Timor-Leste,” dehan Rui.

Kazu daruak, feto ho idade fulan rua seidauk vasina, hela iha Baucau, diagnostikadu iha Hospital Referensia Eduardo Ximenes Baukau ho SIRA tanba Covid-19 iha 10 Setembru. Pasiente ne’e hakotu-iis iha sesta kalan tuku 20.58.

Familia kolabora ho ekipa saúde atu hala’o funeral tuir protokolu ne’ebé adota iha Timor-Leste

Entretantu, husi horseik (10/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 300 kompostu husi Vijilansia sentinela na’in 74, Contact tracing na’in 53, Random screening  na’in 45, Viajen sai husi serka sanitaria Dili na’in 79, Viajen internasional na’in 5 no Follow up iha kuarentena na’in 44.

Teste PCR ne’ebé halo iha Munisipiu sira seluk, RAEOA no HNGV hamutuk na’in 386. No ohin iha Izolamentu Vera Crus, Lahane, HNGV no fatin seluk iha teritoriu laran tomak halo tratamentu hospitalizadu ba kazu detetadu hamutuk na’in 93 kompostu husi kazu grave na’in 12, moderadu na’in 51 no kazu leve na’in 30.