Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo informa, Munisipiu Dili kontinua rejista númeru kazu boot liu kompara ho Munisipiu sira seluk.

Husi total kazu detetadu 92, iha Dili deteta kazu 62, Bobonaro kazu 9, Baukau kazu 5, Ainaro kazu 4, RAEOA kazu 3, Manatuto kazu 4, Kovalima kazu 2, Manatuto kazu 4 no Vikeke kazu 1.

“Husi kazu detetadu ne’e, na’in 37 ka 40,2% hatudu sintomas, na’in 21 ka 23% simu ona vasina kompletu no na’in 7 ka 8% simu ona vasina doze dahuluk,”dehan nia iha komunikadu ne’ebé Online INDEPENDENTE asesu sesta ne’e.

Maske deteta kazu pozitivu, maibé SIJK mós rejista kazu rekuperadu ne’ebé barak liu kazu pozitivu foun. Iha loron 10 fulan-Setembru ema na’in 325 mak rekupera.

Ho nune’e, kazu ativu ne’ebé baixa hela iha Izolamentu hamutuk 3.295.

Totak komulativu kazu konfirmadu hahú husi loron 21 fulan-Marsu tinan 2020 to’o loron 10 fulan-Setembru tinan 2021 hamutuk 18.308.

Entretantu, husi horseik (09/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 462 kompostu husi Vijilansia sentinela na’in 35, Contact tracing na’in 70, Random screening  na’in 49, Viajen sai husi serka sanitaria Dili na’in 129, Viajen internasional na’in 2 no Follow up iha kuarentena na’in 177.

Teste PCR ne’ebé halo iha Munisipiu sira seluk, RAEOA no HNGV hamutuk na’in 321. Ohin, iha Izolamentu Vera Crus, Lahane, HNGV no fatin seluk iha teritoriu laran tomak halo tratamentu hospitalizadu ba kazu detetadu hamutuk na’in 94 kompostu husi kazu grave na’in 14, moderadu na’in 57 no kazu leve na’in 23.