PM hato’o mensajen ne’e ba iha komemorasaun loron Masakre Santa Krús no loron Nasionál Juventude ne’ebé sei selebra iha 12 Novembru 2021.

“Hanesan tinan-tinan ita hanoin ita-nia Juventude Loriku As’wain ho determinante no nakonu ho espíritu luta nian, hamriik hakilar ba mundu katak “Mate Ka Moris Ukun Rasik An”, i iha loron ne’e duni nakfila sai fali trajédia boot “Masakre Santa Krús”, joven feto no mane barak mak raan nakfakar no barak lakon to’o agora”.

Ho grasa filmajem husi Saudozu Max Stahl nian, konsege loke mundu nia matan kona-ba trajédia nakukun ida ne’e, ne’ebé ikus mundu internasionál preokupadu ba Timoroan sira-nia sofrimentu husi asaun burtalizmu forsa okupante sira-nian.

Nune’e, Governu deside mós loron ida ne’e nu’udar Loron Nasionál ba Juventude, hodi fó onra ba joven feto no mane sira ne’ebé masakradu iha loron refere, no loron ida mós nu’udar reflesaun nian, liuliu ba foin-sa’e sira ne’ebé foin boot iha era independénsia nian.

Tuur ba hodi reflete “SAÍDA MAK HA’U BELE FÓ BA HA’U-NIA NASAUN!” no saída mak há’u bele hatutan joven uluk nia misaun ne’ebé hatudu ona, sira harii hela Nasaun RDTL ne’ebé ohin ema hotu goza.

“Aproveita loron ne’e, hakarak apela ba ha’u-nia oan joven sira, hadook imi nia-an husi konflitu oioin, tanba imi monu ba kanek no mate, imi nia inan-aman mak sei sofre, sei lakon, tanba ne’e di’ak liu mak haka’as imi nia-an ba estudu, tanba mundu ohin loron kompetitivu, sé mak la badinas, la inovativu no la kriativu nia sei hela iha kotuk,”liu husi mensajen ne’ebé Online INDEPENDENTE asesu, kinta ne’e (11/11).

Xefe Governo ne’e hatete, Timor-Leste hamrik tinan 19 ona,

Maibé seidauk bele fó satisfasaun ba ema hotu, tanba Estadu iha nesesidade barak tebes, enkuantu rekursu ne’ebé iha la sufisiente atu atende ema hotu iha tempu badak de’it.

“Haree husi esperiénsia Nasaun sira ne’ebé ukun-an liu ita tinan barak, hanesan Timoroan, ita bele orgullu tanba ita la’ós Nasaun ida ne’ebé di’ak liu iha mundu, maibé mós la’ós aat liu iha mundu. Maske ho difikuldade oioin ne’ebé Governu ida ha’u lidera ne’e hasoru, hanesan instabilidade polítika, resesaun ekonomia, Covid-19 no dezastre naturais maibé ita la lakon esperansa,”tenika nia.

Nune’e, Governu sei kontinua halo esforsu hodi kria kondisaun atu nasaun la’o nafatin ba oin, no roda ekonomia mós bele la’o nafatin hodi bele kria kondisaun ba sidadaun sira.

“Tanba hanesan ha’u dehan beibeik, Governu ne’e lakohi husik Timoroan ida hela iha kotuk, mas para ida ne’e, ha’u-nia oan joven sira-nia kontribuisaun importante tebes ba estabilidade ita-nia Nasaun nian,”

“Ikus liu ha’u dejeza Ksolok Loron Nasionál Juventude ba imi hotu. Viva Juventude Loriku As’wain! Maromak fó Bensaun ba Ita hotu! Obrigadu!”. Hakotu nia.