Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé relata ohin iha Dili laiha, maibé iha Munisipiu Baukau no RAEOA rejista feto na’in rua (2).

“Husi totál kazu detetadu foun ohin, kazu ida (1) ka 50% mak hatudu sintomas,”dehan nia iha komunikadu ne’ebé Online INDEPENDENTE asesu, segunda ne’e.

Aleinde, SIJK mós rejista pasiente ne’ebé rekupera husi moras Covid-19 iha na’in 16 no kazu ativu ne’ebé iha Izolamentu hamutuk na’in 208.

Totál komulativu kazu konfirmadu sura husi loron 21 fulan-Marsu tinan 2020 to’o loron 11 fulan-Outubru tinan 2021 hamutuk 19.675.

Entretantu, husi horiseik (10/10) mai ohin teste ne'ebé Laboratóriu Nasionál Saúde halo iha Dili hamutuk 10, kompostu husi, Vijilansia sentinela na’in laiha, Random Screening na’in hitu (7), Viajen internasional na’in rua (2) no follow up iha kuarentena na’in ida (1).

Enkuantu, teste PCR ne’ebé halo horiseik iha Munisípiu sira seluk, RAEOA no HNGV hamutuk 126.

Ho nune’e, Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 22, kompostu husi kazu grave na’in haat (4), kazu moderadu na’in hitu (7) no kazu leve na’in 11.