Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatetet, kazu foun ne’ebé relata ohin iha Dili na’in 9, Baukau na’in 1, Bobonaro na’in 2, Kovalima na’in 2, RAEOA na’in 2 no Vikeke iha na’in 2.

“Husi totál kazu detetadu foun ohin, kazu 11 ka 61,1% mak hatudu sintomas, kazu 5 ka 28% simu ona vasina kompletu no 1 ka 6% simu ona vasina doze dahuluk,”dehan nia iha komunikadu ne’ebé Online INDEPENDENTE asesu, sesta ne’e.

Nune’e, kazu ativu ne’ebé iha Izolamentu hamutuk na’in 279.

Totál komulativu kazu konfirmadu sura husi loron 21 fulan-Marsu tinan 2020 to’o loron 08 fulan-Outubru tinan 2021 hamutuk 19.651.

Entretantu, husi horiseik (07/10) mai ohin teste ne'ebé Laboratóriu Nasionál Saúde halo iha Dili hamutuk 70, kompostu husi, Contact tracing na’in 7, Random Screening na’in 60 no follow up iha kuarentena na’in 3.

Enkuantu, teste PCR ne’ebé halo horiseik iha Munisípiu sira seluk, RAEOA no HNGV hamutuk 171.

Ho nune’e, Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 22, kompostu husi kazu grave na’in 3, kazu moderadu na’in 6 no kazu leve na’in 13.