Tuir juiz prosesu, krime ne’e nia natureza nu’udar semi públiku tanba ne’e lezadu bele dada fali keixa no lezadu mós bele husu atu arguidu sira selu kustu ne’ebé durante ne’e lezadu gasta hodi sosa aimoruk.

Ho nune’e, lezadu Francisco da Costa Tilman husu atu arguidu na’in rua ho inisial CM no PM atu selu indinimizasaun.

Hafoin arguidu sira selu indiminizasaun, juiz prosesu hatutan, foin mak tribunál halo tentativa rekonsiliasaun ba arguidu ho vitima sira.

Tuir akuzasaun husi Ministériu Públiku, iha 6 Maiu 2017 tuku 18:15 OTL iha area Maskariñas lezadu ne’ebé foin fila husi mate-uma ho kondisaun lanu tuur iha nia uma oin no hasai lian maka’as.

Arguidu sira mai no husu ba lezadu katak sira buka lezadu nia alin atu baku, maibé lezadu hatan sira katak nia alin toba hela no aban de’it mak sira mai.

Rona ida ne’e, arguidu CM foti fatuk hodi tuda ba lezadu nia tilun karuk no rezulta lezadu monu ba rai no hetan kanek. PM mós hakat ba hodi tebe dala ida iha lezadu nia kotuk-laran.

Ministériu Públiku akuza arguidu sira hanesan ko-autor material ho forma konsumadu ba krime ofensas integridade fiziku simples ne’ebé previsu iha artigu 145.