Suspeitu na’in tolu ne’ebé hetan kapturasaun, na’in rua dupla sidadania (Timor Leste no Portuges) ho inisial NESF no MTSF no na’in ida seluk DDJ sidadaun Portuges.

PNTL Munisipiu Dili kaptura suspeitu ho inisial NESF nu’udar Diretór kompaña ida ne’ebé deskonfia fasilita ró no karreta ba Tiago ho Fong Fong Guerra, iha Tuanalaran-Dili.

Iha loron hanesan, PNTL Dili kaptura mós MTSF ne’ebé nudar NESF nia alin iha area Manleu-Dili, no kaptura DDJ iha area Tuanalara.

Tuir karta husi PNTL ho númeru 0194/17.PNSIC ne’ebé diariu ne’e asesu, suspeitu na’in tolu ne’e hetan kapturasaun tanba iha 6 Novembru 2017, arguidu DDJ ho MTSF dada ro ho DDJ nia karreta ho númeru matrikula 17.282 TL modelu pickup husi Dili ba Same-Betano.

Iha 7 Novembru, sira entrega ro ba Tiago ho nia feen iha tasi-ibun Betano uza hodi halai ba Darwin, Australia.

Hafoin halo kapturasaun, Segunda (11/12), Komando PNTL aprezenta suspeitu na’in tolu ne’e ba Tribunal Distrital Dili (TDD) hodi submete ba interogatoriu dahuluk.

“Agora (suspeitu sira) iha ne’e ona, prosesu ne’e tribunal nia liman, iha ona Ministériu Públiku, ita hein desizaun tribunal ne’e oinsa,” deklara Komandante Jeral PNTL Komisariu Julio da Costa Hornai iha Kuartel Jeral PNTL, Kaikoli, Segunda (11/12).

Entretantu, Tiago ho Fong Fong Guerra ne’ebé halai ba Australia hafoin simu kondenasaun pekulatu husi Tribunal Distrital Dili (TDD) to’o iha Lisboa Portugal iha 25 Novembru 2017.

Iha fulan Agostu 2017 juiz koletivu TDD kondena prizaun tinan 8 no multa $859.000 ba Tiago ho Fong Fong Guerra tanba komete pekulatu, brankamentu kapital no falsifikasuan dokumentus, no tranferensia osan rihun $859 dólares, ne’ebé halo iha tinan 2011 bazeia ba pedidu husi konsultór norte-amerikanu, Bobby Boye.

La simu ho desizaun ne’e, Tiago ho Fong Fong Guerra hato’o rekursu ba Tribunal Rekursu (TR). Maibé, molok iha desizaun ruma husi TR, feen ho laen ne’e halai ona ba Australia.