“Ami fó hatene ona ba públiku no loza sira kuandu ema ruma uza atributu polisia no militár nian hodi ba halo kobransa tenke komunika lalais kedas ba komandu para bele foti kedas medida”, dehan Segundu Komandu PNTL Munisípiu Dili, Superintendente Asistente Euclides Belo, iha servisu fatin, Kaikoli-Dili, horisehik.

Instituisaun polisia no militár iha ona liña koordenasaun servisu hamutuk atu asegura seguransa iha rai laran, liuliu iha kapitál Dili kona-ba atividade ilegál sira ne'ebé la fó benefísiu ba públiku.

Ne’e duni, Komandu rua ne’e sei la tolera ninia membru sira atu halo hahalok sira hais públiku.

“Membru seguransa no defeza maski sivíl laiha dalan ba atividade ilegál ne’e”, tenik nia.

Euclides husu ba komunidade ne'ebé haree no hetan atitude membru defeza no seguransa hanesan ne’e, buka atu identifika ninia identidade loloos, depois kontaktu mai komandu rua ne’e.

Instituisaun rua ne’e sei la fo fatin no dalan ba membru sira atu ezekuta hahalok sira ne'ebé la’ós orden husi komandu. Kuandu ida ne’e mak akontese duni komandu sei foti medida todan hasoru membru malandru sira.