Tribunál Rekursu hasai ona karta dala tolu ba Parlamentu Nasionál iha III Lejizlatura, maibé deputadu parlamentu anteriór sira ‘asegura-malu’ hodi la tau importánsia ba pedidu ne’e.

Tribunál husu ba deputadu Vicente Guterres atu tuir prosesu justisa relasiona ho ninia envolvimentu iha kazu sosa karreta prado ba deputadu III Lejizlatura sira.

Xefe Bankada CNRT, Aarão Noe de Jesus, hateten sira hein nafatin prosesu husi tribunál atu bele korrespondénsia hodi hasai imunidade ba ba Vicente Guterres.

Maski nune’e, sira haree mós ba iha konteúdu husi karta ne’ebé mai hodi halo analiza hafoin mak bele autoriza.

Nia esplika, bainhira analiza mak prienxe kritériu legál nian, Parlamentu Nasionál sei fó autorizasaun ba deputadu Vicente hodi ba hataan iha tribunál.

“Se tuir prosedura ne’ebé iha, ema ida ka órgaun ida sei la kestiona”, dehan Aarão iha Uma Fukun PN, horisehik.

Nia relembra fali katak, iha III Lejizlatura Parlamentu Nasionál ajenda ona atu diskute, maibé la konsege tanba konsidera pedidu tribunál nian la tuir dalan.

Iha fatin hanesan, Prezidente bankada Partidu Libertasaun Populár (PLP), Fidelis Magalhães, hatete bainhira iha akuzasaun ruma kontra deputadu ida tenke ba hataan, kuandu iha prova katak nia halo sala.

Nia esplika, ema hotu-hotu moris iha justisa nia okos. Tanba ne’e, sidadaun hotu tenke kumpre. Maibé, depois rezultadu husi tribunál dehan deputadu ne’e inosente, entaun bele asume hikas knaar hanesan ema inosente ida.

Nune’e, Prezidente Bankada KHUNTO, Luis Roberto da Silva, dehan ema hotu-hotu tenke koopera ba justisa.

“Tribunál nu’udar mós órgaun soberanu Timor-Leste maka bolu ona ita, tenke respeitu”, tenik nia.

Luis esplika, kualkér xamada ida husi tribunál maka ema ka membru parlamentu, labele halai liu ba imunidade, tenke bazeia ba iha lei. Ema hotu-hotu ne’e hanesan, tantu membru governu ka deputadu tenke kumpre.

Iha fatin hanesan, Prezidente Bankada FRETILIN, Francisco Miranda Branco, hateten tribunál seidauk haruka pedidu, maibé kuandu husu membru governu ka deputadu ruma atu ba hataan iha tribunál tenke ba.

“Se husu prosesu ba oin órgaun soberanu sira tenke kolabora malu. Ha’u hanoin deputadu Vicente Guterres mós nia hakarak kolabora ho justisa”, dehan nia.

Nia esplika, kuandu karta husi tribunál tama ona iha meza Parlamentu Nasionál, maka sira husu ba komisaun kompetente, liuliu sub-komisaun étika atu bele fó pareser no plenária tenke deside hodi kumpre.

FRETILIN nia pozisaun hakarak hatudu diferensa, alternativa, la'ós alternánsia. La’ós mai atu troka malu maibé buat hotu nafatin de'it. Alternativa maka buat ruma oin-seluk.