Maske rekoñese halo ona relasaun seksual ho ninia namorada ho inisial OC, maibé VS lakohi hatudu ninia responsabilidade bainhira OC isin-rua ho razaun bebe ne’ebé OC kous la’os ninian.
Tanba nega, OC hato’o keisa ba Xefe Suku hodi bolu VS atu rezolve, maibé VS lakohi nune’e OC deside hodi hato’o keisa ba Ministériu Públiku nune’e ikus mai VS tenke ba hatan iha Tribunal Distrital Dili.
Liu husi audensia julgamentu iha TDD, Ministériu Públiku (MP) akuza arguidu komete krime interopsaun gravida ne’ebé prevista iha artigu 141 kodigu penal Timor-Leste.
Tuir akuzasaun MP, iha 12 Agustu 2013 iha Ailok-Laran arguidu ba lezada nia uma hodi husu numeru telephone, hafoin iha 20 Agustu 2013 bainhira arguidu fila husi Ainaro, nia hahú halo relasaun domin ho lezada.
“Iha loron 16 fulan Outubru tinan 2014 tuku 1:00 madrugada, arguidu telephone ba lezada dehan ‘Ó sai mai li’ur lai, iha imi-nia uma kotuk, ha’u hein iha ne’e’. Nune’e lezada mós sai ba hodi halo relasaun seksual,” akuza MP.
Iha loron hirak tuir mai, iha 25 Outubru 2014 tuku 1:00 madrugada, arguidu kontaktu fali lezada no husu atu ba uma kotuk no sira hala’o hikas relasaun seksual.
Hatan ba akuzasaun ne’e, arguidu dehan katak faktus balun loos no balun sala.
Arguidu dehan, nia la ba lezada nia uma hodi husu númeru telephone maibé lezada mak hakerek nia númeru no fó ba nia alin hodi fó ba arguidu, no lezada mak telephone uluk nia.
Arguidu dehan, bainhira lezada telephone, nia sadik arguidu dehan ‘ha’u sadik Ó, se karik mane Ó sai mai li’ur, ha’u hein hela iha uma kotuk ami nian’.
Kona-ba halo relasaun seksual, arguidu rekoñese loron no oras loos hotu no sira halo duni relasaun seksual dala rua.
Maibé, arguidu la rekoñese bebe ne’ebé lezada kous, ho razaun sira halo relasaun seksual ho pozisaun hamriik no nia fakar sai sperma.
“Ami halo relasaun ne’e ho hamrik de’it. sperma ha’u hasai, la hatama ida. Ha’u sente katak oan ne’e la’os hau-nia oan,” deklara arguidu.
Iha fatin hanesan, lezada OC informa ba Tribunál katak, iha momentu ne’e arguidu telephone ba nia no dehan katak nia gosta lezada nune’e sira hahú hala’o relasaun domin.
“Iha altura ne’eba arguidu telephone dehan ‘Ó sai mai li’ur lai, ha’u iha imi-nia uma kotuk’,” dehan OC.
Hafoin to’o iha fatin, lezada dehan, arguidu husu ba nia atu halo relasaun seksual tanba sira na’in rua namora kleur ona. Arguidu mós promete atu sei responsabiliza bainhira lezada hetan isin-rua.
“Maibé ikus mai ha’u isin-rua nia nega dehan katak labarik ne’e la’os nia oan,” hatete lezada ba Tribunál.
Tanba arguidu nega, lezada hato’o uluk keisa ba Xefe Suku hodi bele buka dalan atu rezolve, maibé tanba arguidu kontinua nega, ikus mai lezada deside hodi hato’o keisa ba Ministériu Públiku.
Ba kazu ne’e, Tribunál submete ba julgamentu tanba arguidu atu halo teste DNA ba labarik. Nune’e, Tribunál adia fali ba loron 21 Marsu 2017 tuku 4:00 loraik Otl hodi rona desizaun.
Audensia julgamentu ne’e prezide husi Juiz Koletivu, Antonio Goncalves, Zumiaty Freitas, no Zulmira Auxiliadora da Silva. MP reprezenta husi Prokuradór Nelson Carvailho, no arguidu hetan asistensia legal husi Defensór Públiku Manuel Marsal.
