Tuir MP, arguidu Abilio ninia hahalok ne’e hamosu prejuizu ekonomikamente no finanseira ba estadu ho montante $118,893, nune’e arguidu iha obrigasaun atu tenke selu fali prejuizu ba estadu.
Tuir akuzasaun MP iha prosesu julgamentu katak iha Agostu 2010, PN lansa konkursu ho modelu konkursu públiku nasionál atu fornese ekipamentu IT (Informasaun no Teknolojia) ba PN, ne’ebé ninia espesifikasaun prepara husi arguidu Abilio nudar Xefe DITIC.
Konkursu ne’e nia rejultadu kompania Everson Network mak manan hodi fornese ekipamentus IT ba PN ho montante global $348,116, ne’ebé fahe ba lot A no B.
Iha lot A, ekipamentus IT ne’ebé kompania sosa mak Wilmax ho montante global $60,482.00, Sony digital Camera $600, gravadór ho marka HP ho presu global $6,166, panasonic central telefonica ho presu global $1,900, VSAT ho presu global $30,370 no MS ho presu $9,375.
Iha 14 Outubro 2010, kompaña asina kontratu ho PN no iha 30 Novembru 2010, kompaña hatama ekipamentu sira mai ne’ebé simu husi arguidu Abilio no Xefe Lojistika PN, Lino S. de Carvalho.
Bainhira kompaña hatama ekipamentu sira ne’e, sasan sira ne’e la rai iha Divizaun Lojistika nia fatin, maibé rai fali iha arguidu Abilio nia serbisu fatin, ho razaun katak ekipamentu sira ne’e sensitivu liu.
Ikus mai, ekipamentu hirak ne’e lakon iha arguidu nia serbisu fatin.
Aleinde ne’e, VSAT ne’ebé sosa ho folin $30,370 atu monta iha PN hodi distribui liña internet la konsege monta tanba PN hetan doasaun VSAT husi The Asian Foundation iha tinan 2011, no arguidu apropria tiha VSAT no uza ba nia privadu.
Ekipamentu hirak ne’e lakon iha arguidu nia fatin no arguidu aproveita ekipamentu sira ba ninia interese privadu.
“Arguidu Abilio hatene katak ekipamentu IT sira ne’e la pretense ba nia maibé instituisaun Estadu, Parlamentu Nasionál nia patrimoniu. Arguidu Abilio aproveita kargu funsaun ne’ebé nia iha hodi apropria ekipamentu IT sira ne’e hodi dezvia tiha nia distinu loloos ba servisu Parlamentu Nasional,” akuza MP.
“Ekipamentu sira ne’e nudar patrimoniu PN nian, no sai patrimoniu Estadu, funsionariu ida nunka deside hodi foti ba nia an ka halo lakon, mezmu ekipamentu sira ne’e PN la uza ona,” deklara MP liu husi ninia akuzasaun.
Ho hahalok ne’e, MP akuza argudi Abilio halo violasaun grave ba ninia dever no funsaun ne’ebé prevee iha artigu 40 no 41 lei funsaun publiku.
“Arguidu Abilio halo hahalok ne’e ho livre, deliberada ho konsientemente, katak aktu ne’ebé mak nia halo ne’e husi dalan ne’ebé ilejitimu no tuir loloos direitu la pretense ba nia,” katak MP.
Ho faktu hirak ne’e, MP akuza arguidu Abilio Bernardo Caldas hanesan autór material ho forma konsumandu ba krime pekulatu tuir artigu 295 kodigu penal Timor-Leste.
Tribunal adia fila fali julgamentu ba loron 22 Abril 2017 hodi rona deklarasaun no testemuña sira, tanba Defensor husi arguidu konfesa ba tribunal katak arguidu foin simu notifikasaun iha 06 Fevereiru 2017. Tan ne’e, tribunal fó loron 15 ba arguidu atu halo konstestasaun ba akuzasaun husi MP.
Audensia julgamentu ne’e prezide husi Juiz Kolektivus Ivan Suriaty, Edite Palmira dos Reis no Maria Modesta. MP reprezenta husi Prokurador Angelina Saldanha no arguidu hetan asistensia legal husi Defensor Publiku Pedro Aparicio.
