Tuir ONG Luta Hamutuk, kazu oho Xineza ne’e sei hatudu ba mundu internasionál katak Timor Leste nu’udar nasaun ne’ebé la seguru.
“Ami sosiédade sivil sente katak (oho Xineza) ne’e ladun di’ak, ne’e hamonu estadu Timor Leste ninia oin iha mundu internasionál, signifika ita sei iha nasaun ne’ebé ladun seguru,” deklara Diretór Ezekutivu LH José Alves iha nia knar-fatin, Farol, Sesta (29/03).
Tuir nia, loloos tenke trata no asegura ema estranjeiru sira ne’ebé mai hala’o serbisu ka vizita Timor Leste ho di’ak, se lae bele fó impaktu negativu ba imajen TL iha sira-nia nasaun no mundu internasional.
Ba kestaun seguransa, nia dehan, polisia sira seidauk hala’o sira-nia funsaun ho di’ak tanba movimentu iha kuaze bairu sira iha Dili laran to’o de’it iha tuku 7.00 kalan, liu ida ne’e ema tauk ona halo movimentu.
“Ha’u hanoin governu tenke fó atensaun maka’as ba ida ne’e, oinsá atu halo prevensaun, atu nune’e ema hotu livre,” dehan nia.
Maske nune’e, Diretór Ezekutivu LH ne’e iha esperansa ba Komando foun Polisia Nasionál Timor Leste ne’ebé hatudu komitementu atu asegura seguransa nune’e ema bele halo movimentu ho livre durante oras 24 nia laran.
“Sá maneira mak sira atu halo, ita hotu hein. Maibé atu dehan de’it katak tenke para ona krime sira ne’ebé mosu no ita moe liu tan bainhira Timor-oan mak oho ema estrajeiru iha estrada públiku. Ha’u hanoin ne’e ladun di’ak, tanba ita-nia alin, ita-nia oan sira mós iha rai estrajeiru ne’e mós barak, ita-nia tauk mak orsida sira halo balas dendam ne’e,” dehan nia.
Iha fatin ketak, Diretór Ezekutivu AJAR José Luis Olveira admira ho serbisu PNTL ne’ebé iha tempu badak nia laran konsege identifika no deskobre autór oho Xineza.
“Ha’u admiradu uituan oinsá mak polísia hetan lalais (autór), nusa mak ba ema seluk to’o agora ne’e suspeitu ne’e ita la deskobre?, ida ne’e buat ne’ebé admiradu uitoan,” dehan nia.
Ba kestaun atu redus krime iha TL, José Luis dehan, labele uza de’it aprosimasaun forsa no la’os atu aumenta númeru forsa ka husu apoiu husi F-FDTL ka halo lei hodi bandu no taka grupu artemarsiais.
“Ida ne’e la rezolve problema. Defaktu hatudu katak ema baku malu nafatin, ema sona malu nafatin,” dehan nia.
Tuir nia atu rezolve problema ne’ebé iha daudauk ne’e, tenke buka hatene abut problema krime ne’e saida.
“Ema baku malu tanba hada’u malu buat ruma karik, tanba atu moris sira tenke sustenta sira nia an neduni sira hadau buat ruma karik ka sira baku malu mekanizmu forma ne’ebé iha la funsióna karik,” katak nia.
Entretantu, iha Kinta (28/03) ka loron tolu hafoin kazu oho Xineza Tan Lin Xue akontese, suspeitu na’in ida entrega an ba PNTL.
Suspeitu ho inisial AF ne’ebé deskonfia nu’udar autór prinsipal ba kazu oho Xineza ne’e entrega an ba polisia hafoin subar durante loron haat iha Lolotoe, Munisipiu Bobonaro.
Komandante Jeral daruak PNTL, Komisariu Mateus Fernandes, hafoin oho vitima, suspeitu AF halai hodi ba subar iha Lolotoe. Maibé, tanba sente tauk ikus mai suspeitu entrega an ba polisia.
“Iha horibainrua (Tersa) ne’e madadu kapturasaun tuun, PNTL liu husi ekipa investigasaun tuun buka suspeitu ne’e, ikus mai suspeitu AF rasik mak telefone ba PNTL hodi entrega nia aan, maibe sei iha tan aútor na’in rua mak seidauk kaer, ida prinsipal mak kaer ona,” informa Komisariu Mateus liu husi telefone, Kinta (28/03).
