DILI: Ekipa Forensik Polisia Nasionál Timor Leste lori ona sampel raan husi familia matebian Vera Carvalho Martins ba Australia hodi halo teste DNA.

Informasaun ne’e hato’o husi Vera nia tiun, Francisco Aleixo Cobra via telefone ba jornalista jornál INDEPENDENTE, Sesta (12/10).

Tuir informasaun husi Francisco, ekipa Forensik bolu Vera nia inan-aman hodi foti sampel iha 2 Outubru foin lalais.

“Vera nia inan-aman hasoru malu ona ho PNSIK iha loron 2 Outubru 2018, rezultadu hasoru malu ne’e sira ofrese ona ran, ain kukun no fuk-lahan ba Forensik,” informa Francisco.

Tuir informasaun ne’ebé Francisco hetan, sampel ne’e ekipa Forensik lori ona ba Australia iha loron 4 Outubru.

“Sampel raan, fuk-lahan no ain-kukun ne’e Forensik haruka ona ba Australia loron rua depois foti sampel,” dehan nia.

Hafoin foti sampel ne’e, Francisco dehan, ekipa Forensik hatete ba familia atu hein de’it kontaktu bainhira rezultadu teste DNA sai ona.

“Sira dehan hein de’it depois mak sira kontaktu fali kuandu rezultadu iha ona sira-nia liman. Sira husu familia Vera kontinua pasensia hodi hein,” katak nia.

Familia, nia dehan, sente kaman ona tanba buat hotu ne’ebé mak tribunal ezije bele iha ona dalan. Durante ne’e, familia la hakmatek tan hanoin hela Vera nia mate atu saugati de’it.

“Ami sente kazu Vera nian sei hatudu rezultadu pozitivu. Ami hein nafatin no ami fiar katak rezultadu ne’e la kleur tan (sei sai),” katak nia.

Entretantu, ofisial PNSIK ida hatete sira foti duni ona sampel husi Vera nia familia, maibé informasaun detalu foin bele fó sai hafoin iha ona rezultadu.

“Kuandu rezultadu iha ona bele konfirma direita ho komandante PNSIK,” dehan fonte ne’e.