Tuir fonte konfirmadu ida, kazu ne'e akontese tanba membru F-FDTL ne'ebé lanu iha konsertu ne'ebé organiza husi Bintang la simu bainhira membru PNTL ne'ebé fó seguransa hasee sira tanba hemu lanu no fakar tua ne'ebé komisaun organizador sira prepara.

“Sira (membru F-FDTL) mai konsertu ho kondisaun lanu. Sira hemu tan tua ne’ebé prepara ona depois fakar estraga. Ne’eduni polisia na’in rua ne’ebé halo seguransa iha eventu konsertu ne’e mai hasee sira atu labele estraga tanba ema seluk mós hakarak hemu,” informa fonte ne’ebé lakohi públika identidade ba jornalista INDEPENDENTE, foin lalais.

Maibé tanba lanu liu ona, fonte ne’e hatutan, membru F-FDTL ne’ebé hatais sivil hahú diskuti-malu ho membru PNTL sira.

“Sira hatan ba membru PNTL dehan ‘imi hanesan fali abut. Imi hanoin katak imi mak kaer iha Maliana ne’e ka?’. Koalia hotu nune’e, sira halo kedan asaun,” fonte ne’e konta.

Tanba lakohi atu problema ne’e sai boot liu tan, nia hatutan, polisia na’in rua halai sees, maibé membru F-FDTL ne’e duni tuir to’o iha postu polisia.

Iha postu polisia, membru F-FDTL hakilar no tolok, no la kleur de’it membru F-FDTL sira seluk mai tan no hahú tiru teiu.

“Polisia la halo asaun tiru hasoru. Maibé sira kontaktu de’it ba maluk polisia sira seluk. La kleur karreta ida mai husi kotuk ho armadu hodi bolu atensaun ba forsa sira atu hapara tiru. Tanba sira laiha dalan kuandu sira kontinua tiru,” katak fonte ne’e.

Tanba sente book an la di’ak, ikus mai, membru F-FDTL sira retira no situasaun kontroladu fila fali.

“Maske nune’e komunidade sira sente tauk no trauma,” fonte ne’e dehan.