Realidade moruk ida ne’e mak Tomas Alves tenke hasoru. Nia fuan rahun haree nia oan-mane boot, Adelino Alves, nakonu ho raan no hakilar tahan moras hafoin kilat-musan borus iha nia kanuruk.

“Nia kanuruk kanek no raan sai husi ibun. Iha karreta laran nia hakilar de’it ‘ha’u mate ona’. Nia bolu ha’u dala rua de’it,” Tomas konta menutu ikus nia akompaña nia oan ne’ebé kanek tanba deskonfia hetan tiru husi arguidu ho inisial RCA.

Tomas konta istoria ne’e bainhira sai sasin ba kazu ne’ebé rezulta nia oan-mane boot mate, iha Tribunal Distrital Dili, Tersa (24/07).

Nu’udar aman, Tomas dehan, nia sente triste no fuan rahun tanba lakon nia oan-mane boot.

“Iha momentu ne’e ha’u rasik mak lori ba Ospital, tanba kalan, iha altura ne’eba ha’u la besik ba vitima, ha’u trauma,” dehan sasin ne’e.

Tuir akuzasaun husi Ministériu Públiku, iha 3 Outubru 2017 tuku 1.00 dader-nakukun arguidu NPC telefone ba arguidu RCA hodi informa kona-ba ema husi Postu Penal ataka Temporal.

Rona informasaun ne’e, arguidu RCA ne’ebé hela iha Temporal sai husi uma ho kilat-manu.

Iha altura ne’ebá, Adelino Alves ho nia kolega sira fila ba uma hafoin hemu tua iha merkadu Taibessi no hetan tuda husi arguidu sira.

Adelino ho nia kolega sira halai namkari no arguidu RCA lori kilat-manu duni no tiru vitima iha parte kanuruk.

Entretantu, iha audensia julgamentu ne’ebé hala’o ona arguidu na’in tolu ho inisial NPC, CRM no BSS rekuza akuzasaun husi MP.

Tuir arguidu NPC, nia CRM no BSS la envolve iha kazu tuda-malu ne’ebé rezulta vitima Adelino mate.

Iha momentu ne’ebá, nia konta, nia ho arguidu na’in rua seluk atu ba sosa supermi iha merkadu Taibessi, maibé iha dalan ema husi Postu Penal hakilar dehan Temporal milisia no hahú tuda.

“Ami halai fila, la konsege hola supermi tanba sira tuda,” dehan arguidu ba tribunál.

Arguidu mós deklara la’os nia mak telefone arguidu RCA no nia la hatene arguidu RCA lori kilat-manu ba tiru vitima.

“Iha altura ne’ebá ha’u ho NPC halai fahe-malu tanba vitima sira tuda. Arguidu RCA tiru vitima ne’e ha’u la hatene,” hatutan arguidu seluk, CRM.

“Iha momentu ne’ebá ha’u hadeer hela iha mate-uma, maibé NPC ho CRA mak bolu dehan atu la’o halimar lai, depois sira nain rua la’o uluk mak ha’u tuir ba, maibé iha dalan (kolega) Natalino halai hasoru ha’u dehan katak Bairu Postu Penal tuda ita, entaun ha’u mós halai, see see mak tiru vitima ne’e ha’u laiha koñesimentu,” afirma arguidu BSS.

Arguidu RCA ne’ebé deskonfia tiru vitima deklara katak nia hetan kontaktu husi arguidu NPC kona-ba ema ataka sira-nia bairru.

Hafoin simu informasaun, arguidu dehan, nia foti kilat-manu no sai ba hodi tiru.

“Maibé kona see ha’u la hatene tanba ema barak,” dehan arguidu.

Tribunál adia julgamentu ba 30 Jullu tuku 11.00 hodi rona deklarasaun husi sasin sira seluk.